2 красавіка ў гродзенскай парафіі Святога Духа прадстаўнікі руху “Абарона жыцця” выступілі з лекцыяй, прысвечанай каштоўнасці чалавечага жыцця.
У сустрэчы ўдзельнічала больш за 200 дзяцей, якія ў гэтым годзе прыступяць да Першай святой Камуніі. Галоўнымі думкамі лекцыі было тое, што кожнае зачатае жыццё з’яўляецца святым і што Бог заклаў у свет прыроды мудрасць.
Выкарыстоўваючы зразумелую мову, наглядныя прыклады і маляўнічыя ілюстрацыі, дзецям распавялі пра зараджэнне новага жыцця, пра тое, як з клеткі вырастае чалавек. Каб лепш данесці гэтую думку, лектары звярнуліся да свету прыроды. Яны расказалі пра тое, колькі часу розныя жывёлы выношваюць сваіх дзіцянятаў.
Дзеці з цікавасцю слухалі пра клопат, які праяўляюць жывёлы да сваіх дзяцей. Гэтыя прыклады з жывёльнага свету дэманстравалі, наколькі важна клапаціцца пра кожнае жыццё.
“Спадзяёмся, што веды, якія дзеці атрымалі на сустрэчы, будуць прыгадваць ім аб тым, што жыццё – святы і недатыкальны дар Бога” – адзначаюць арганізатары сустрэчы.
С. Вікторыя Галуза, прэс-служба Гродзенскай дыяцэзіі
