З 14 па 16 сакавіка ў кляштары Кангрэгацыі Сясцёр Найсвяцейшай Сям’і з Назарэта прайшлі рэкалекцыі для мужчын Асацыяцыі Святой Сям’і з Назарэта.
Рэкалекцыі мелі назву “Усё магу ў Тым, хто мяне ўзмацняе” (Флп 4, 13).
Перад рэкалекцыямі ўдзельнікам было дадзена заданне прачытаць Пасланне апостала Паўла да Філіпянаў. У межах рэкалекцый яны разважалі над ім, у гэтым ім дапамагаў кс. Алег Шпець TChr з Мінска.
Значнае месца ў праграме рэкалекцый займала малітва за сем’і. Таксама ў праграме быў начны Крыжовы шлях на месца мучаніцкай смерці благаслаўлёных навагрудскіх назарэтанак, расстраляных у часы Другой сусветнай вайны ў Батароўскім лесе. Крыжовы шлях праводзіўся ў інтэнцыі сем’яў. Падчас набажэнства ўдзельнікі неслі крыж, які быў у руках навагрудскіх мучаніц у іх апошняй дарозе.
Прэс-служба Гродзенскай дыяцэзіі
