15 сакавіка студэнты прапедэўтычнага курса Міждыяцэзіяльнай вышэйшай духоўнай семінарыі ў Гродне наведалі шчучынскую парафію св. Тэрэзы Авільскай, дзе служаць айцы піяры.
Візіт адбыўся ў межах падарожжа па беларускіх парафіях, якое здзяйсняюць семінарысты разам са сваім мадэратарам, каб пазнаёміцца з жыццём Касцёла ў нашай краіне.
Айцец Аляксандр Махнач SP, настаяцель мясцовага кляштара піяраў і пробашч шчучынскай парафіі, пазнаёміў гасцей з гісторыяй парафіяльнай святыні. Сярод іншага яны пачулі, што ў савецкія часы ў ёй змяшчаўся ваенны штаб і што крыж, які знаходзіўся ў галоўным алтары, спрабавалі спаліць і ў выніку распілавалі, паколькі ён не згарэў. Шчучынскі касцёл з’яўляецца санктуарыем, паколькі ў яго галоўным алтары знаходзіцца драўляная фігура Маці Божай Фацімскай, каранаваная Янам Паўлам ІІ у 1991 г. у Польшчы. Акрамя таго, было распаведзена, што ў касцёле знаходзяцца рэліквіі, перададзеныя піярам з Рыма, якія захаваліся з тых часоў, калі ў святыні быў ваенны штаб.
Семінарысты пабачылі рэліквіі і шматлікія абразы, якія ўдалося захаваць у касцёле.
Пасля госці пабывалі ў кляштары, дзе пробашч пазнаёміў іх з гісторыяй ордэну піяраў, распавёў пра жыццё ў ім і пра сваё пакліканне.
Прэс-служба Гродзенскай дыяцэзіі
