15 сакавіка група самых актыўных міністрантаў парафіі Святога Духа ў Гродне са сваімі душпастырамі здзейсніла падарожжа па юбілейных святынях Гродзенскай дыяцэзіі.
Першымі з наведаных былі касцёлы ў Асаве і Радуні.
Затым падарожнікі пабывалі ў дыяцэзіяльным санктуарыі Маці Божай Каралевы сем’яў у Тракелях. Кусташ кс. Вадзім Сурвіла распавёў ім пра духоўнае значэнне гэтага месца і яго ролю ў жыцці вернікаў. Гэтыя госці сталі першымі пілігрымамі тракельскага санктуарыя з часу прызначэння ксяндза Сурвілы кусташам.
Наступным пунктам маршруту быў касцёл у Іўі, затым касцёл ва Уселюбе – адно з найстарэйшых месцаў беларускай каталіцкай спадчыны, дзе сёння знаходзіцца рэлігійны комплекс.
Асаблівым момантам пілігрымавання стала наведванне парафіі ў Навагрудку. Тут адбылася святая Імша, пасля якой гасцей чакалі абед і экскурсія па касцёле і яго падзямеллі. Вялікім задавальненнем для іх было слуханне арганнай музыкі. На шляху з Навагрудка пілігрымы не абмінулі месца расстрэлу благаслаўлёных назарэтанак-мучаніц.
Потым яны наведалі старадаўні касцёл у Дварцы. Пасля завіталі ў Дзятлава, дзе іх цёпла прыняў пробашч кс. Андрэй Лішко. Там міністранты здзейснілі экскурсію па касцёле, яго падзямеллі і вежы.
Апошнім з наведаных касцёлаў стаў санктуарый Езуса Журботнага ў Росі. Там пілігрымы ўзнеслі малітву падзякі за ласкі, атрыманыя ў гэтым падарожжы.
Па словах удзельнікаў, кожная з наведаных святыняў уразіла іх сваёй гісторыяй, архітэктурнай прыгажосцю і духоўнай глыбінёй, святары цёпла сустракалі іх, падарожжа было напоўнена малітвай, незабыўнымі эмоцыямі і братэрскім адзінствам, стала для іх напамінам, што Касцёл – жывая супольнасць, якая будуецца праз малітву, веру і любоў.
Прэс-служба Гродзенскай дыяцэзіі
