16 сакавіка, у Другую нядзелю Вялікага посту, біскуп Гродзенскі Уладзімір Гуляй наведаў дыяцэзіяльны санктуарый Езуса Журботнага ў Росі (Ваўкавыскі дэканат).
У гэтай святыні біскуп быў ахрышчаны, яна знаходзіцца ў шэрагу юбілейных касцёлаў, устаноўленых такімі з нагоды Юбілейнага 2025 года.
На Эўхарыстыі прысутнічала шмат парафіян. Пастыр Касцёла на Гродзеншчыне маліўся на літургіі аб здароўі для арцыбіскупа эмерыта Тадэвуша Кандрусевіча, у якога анкалагічнае захворванне.
У гаміліі біскуп, разважаючы над фрагментам Евангелля пра Перамяненне Хрыста, прапанаваў вернікам падумаць, што з’яўляецца Гарой Перамянення – “месцам, з якога я вяртаюся іншым, перамененым” – для кожнага з іх, а таксама чым дапамагаюць ім на шляху да духоўнага перамянення Вялікі пост, малітвы, пастановы і іншае.
Па словах біскупа, “Касцёл хоча вывесці і нас на Гару Перамянення, каб мы інакш паглядзелі на свет, на праблемы, на іншага чалавека, паглядзелі быццам з гары, з пункту гледжання Бога”. Нагадваючы словы з фрагменту пра Перамяненне: “Гэта Сын Мой умілаваны, Яго слухайце”, іерарх адзначыў: “Бог жадае, каб мы заўважылі Яго прысутнасць ва ўсім, жадае, каб мы пачулі і запомнілі назаўсёды, што Хрыстус – гэта ўмілаваны Сын Божы, якога мы павінны слухаць”.
Такім чынам, патлумачыў біскуп, важна слухаць Езуса ў тым, што Ён казаў у сваім навучанні. “Навяртайцеся і верце ў Евангелле – гэта значыць перамяняйце сваё жыццё, змяняйце, прыстасоўвайце сваё жыццё да Евангелля, – дадаў іерарх. – Сапраўднае перамяненне, навяртанне заключаецца ў штодзённым угляданні ў Бога – Езуса Хрыста, ва ўспрыманні Яго як Пана і рэалізацыі жыцця паводле Ягонага навучання”.
Ці магчыма, каб мы навярнуліся, перамянілі сваё жыццё і дайшлі да неба? Гэта магчыма! Хрыстус праз Касцёл запрашае нас на Гару Перамянення, а ёю з’яўляецца нядзельная Эўхарыстыя, – сказаў біскуп. – Актыўна ўдзельнічаючы ў сакрамэнце святой Камуніі, мы ўмацоўваем нашу веру, надзею і любоў, перамяняем сваё жыццё, навяртаемся”.
У канцы Імшы кс. канонік Чэслаў Паўлюкевіч, кусташ санктуарыя і пробашч парафіі ў Росі, падзякаваў біскупу за дар супольнай малітвы, а таксама папрасіў удзяліць пастырскае благаслаўленне на Вялікі пост, каб парафіяне маглі належным чынам падрыхтавацца да сустрэчы з Уваскрослым Панам.
Прэс-служба Гродзенскай дыяцэзіі
