14-15 сакавіка ў Гродне прайшоў Нацыянальны капітул Францішканскага ордэну свецкіх у Беларусі.
У яго межах адбыліся выбары нацыянальнага настаяцеля, намесніка і дарадчыкаў. Настаяцельніцай абралі Людмілу Свойчык з Гродна, намеснікам – Крысціну Лісай, таксама з Гродна, дарадчыкамі – Ірыну Руткоўскую з Маладзечна і Марыну Кажаронак з Мінска.
Таксама была прадстаўлена справаздача дзейнасці Нацыянальнай рады ордэну, адбыліся набажэнствы, канферэнцыі, дыскусіі на тэму францішканскай духоўнасці і абвяшчэння евангельскага паслання ў сваім асяроддзі.
Члены Францішканскага ордэну свецкіх абавязуюцца весці сваё жыццё на аснове Евангелля па прыкладзе святога Францішка Асізскага і з дапамогай зацверджанай Касцёлам Рэгулы.
У першы дзень капітулу біскуп Гродзенскі Уладзімір Гуляй цэлебраваў у касцёле Маці Божай Анёльскай святую Імшу для ўдзельнікаў. Ён нагадаў у гаміліі, што свецкія францішкане пакліканы да “навяртання сэрца – глыбокай унутранай перамены, якая адбываецца дзякуючы Божай ласцы” – і, як святы Францішак быў “люстэркам Хрыста”, так і яны пакліканы “быць Ягоным адлюстраваннем у свеце”.
“Ваш францішканскі і свецкі шлях – гэта заклік жыць Евангеллем без кампрамісаў, у прастаце і духоўнай беднасці. Беднасць тут разумеецца не толькі як адсутнасць матэрыяльных дабротаў, а найперш як духоўная свабода – здольнасць належаць Богу і іншым, не шукаючы асабістай карысці. Святы Францішак прыняў Евангелле як “правіла і жыццё”, і гэта запрашэнне звернутае таксама да вас, – патлумачыў біскуп. – Папа Францішак, які носіць імя гэтага святога, працягвае тую ж місію абвяшчэння Евангелля праз любоў і служэнне. У сваім навучанні ён неаднаразова падкрэслівае, што Касцёл не можа замыкацца ў сабе, а павінен выходзіць у свет, каб несці надзею, супакой і радасць”.
“Вы – частка Касцёла “ў дарозе”, які не застаецца за зачыненымі дзвярыма, а выходзіць да людзей, асабліва да тых, якім патрабуецца падтрымка і любоў. Ваша місія – быць сярод людзей, сведчыць пра Хрыста ў сем’ях, на працы, у грамадстве. Вы пакліканы несці Добрую Навіну, асабліва тым, хто знаходзіцца на перыферыях жыцця – адзінокім, бедным, забытым. Як калісьці францішканскія брацтвы засноўвалі шпіталі і прытулкі, так і сёння вам трэба з творчым падыходам шукаць новыя формы служэння найбольш патрабуючым”, – сказаў іерарх.
Ён пажадаў свецкім францішканам, каб іх жыццё напаўнялі блізкасць, спагада і надзея, якая заключаецца ў “імкненні перамяняць свет” праз адносіны з людзьмі і ўдзел у сацыяльнай дзейнасці, заклікаў іх “імкнуцца будаваць свет, дзе ўсе адчуваюць сябе братамі і сёстрамі”, памнажаць мір і дабро згодна з францішканскім заклікам.
Біскуп падзякаваў членам ордэну за штодзённую малітву і служэнне Касцёлу.
Прэс-служба Гродзенскай дыяцэзіі
