16 сакавіка, у Другую нядзелю Вялікага посту, біскуп эмерыт Аляксандр Кашкевіч цэлебраваў Эўхарыстыю ў гродзенскай катэдры св. Францішка Ксаверыя.
На гэтай літургіі іерарх асабліва маліўся аб здароўі для арцыбіскупа эмерыта Тадэвуша Кандрусевіча.
На Імшы прысутнічала шмат чалавек.
У гаміліі біскуп сказаў, што час Вялікага посту нагадвае пра неабходнасць унутранага перамянення. Гэтае перамяненне, дадаў ён, можа здзейсніць толькі Бог, але патрабуецца і ўдзел чалавека – яго “ўзыход на гару”.
“Мы можам зрабіць з нашых сэрцаў шатры, у якіх прымем Езуса, а разам з Ім Айца і Духа Святога”, – адзначыў біскуп. Пра шатры гаворыцца ў Евангеллі ў сцэне Перамянення Пана, калі апостал Пётр прапануе Езусу зрабіць такія шатры на гары Табор (пар. Мц 17, 1-9).
Іерарх падкрэсліў, што варта “ўзыходзіць на Табор штодзённа – удзельнічаць у Эўхарыстыі, прысвячаць час малітве, – бо з гэтай гары спускаешся іншым чалавекам: з перамененым сэрцам і зіхатліва-яснай душой”.
У канцы Імшы біскуп пажадаў вернікам добра правесці Вялікі пост і належным чынам падрыхтавацца да сустрэчы з Уваскрослым Панам.
Прэс-служба Гродзенскай дыяцэзіі
