З 14 па 16 сакавіка дапаможны біскуп Пінскай дыяцэзіі Андрэй Зноска правёў у парафіі Узвышэння Святога Крыжа ў Астраўцы велікапосныя рэкалекцыі.
Як паведамляе pinskdiocese.by, у межах рэкалекцый разважалі на тэмы навяртання сэрца і прабывання з Богам.
Таксама біскуп узначаліў набажэнства Крыжовага шляху, сустрэўся з малітоўным групамі, а асаблівую ўвагу прысвяціў заняткам з малодшымі парафіянамі. Акрамя таго, ён наведаў супольнасць сясцёр эўхарыстак.
Перад развітаннем іерарх цэлебраваў Імшу за ўсю парафію. Літургію канцэлебравалі пробашч кс. Юрый Кузьміч і кс. канонік Антоній Казлоўскі з Вішнева, з якімі біскуп вучыўся на адным курсе семінарыі.
Ксёндз Юрый Кузьміч стаў пробашчам гэтай парафіі пасля таго, як адышоў у вечнасць яе ранейшы пробашч, кс. Андрэй Горбач.
