6 сакавіка ў парафіі Найсвяцейшай Тройцы ў Лідзе прайшоў дзень засяроджання для святароў, якія служаць на тэрыторыі Гродзенскай дыяцэзіі.
Сустрэчу ўзначаліў біскуп Гродзенскі Уладзімір Гуляй, у ёй удзельнічала больш за 100 святароў – дыяцэзіяльных і з манаскіх супольнасцяў.
У межах дня засяроджання адбылося набажэнства Крыжовага шляху, якое давала ўдзельнікам магчымасць прыгледзецца да свайго жыцця і задумацца над тым, што зрабіць, каб яно было лепшым і прыносіла плёны.
Пробашч шчучынскай парафіі св. Тэрэзы Авільскай а. Аляксандр Махнач SP выступіў з канферэнцыяй “Канфлікты, прабачэнне і паяднанне ў святарскай супольнасці”. У ёй гаварылася пра прычыны, наступствы і спосабы вырашэння канфліктаў, пра памылкі мыслення духоўных асобаў у спробах выйсця з канфлікту, пра тое, што рабіць, каб паяднацца з сабратам.
Таксама адбылася адарацыя Найсвяцейшага Сакрамэнту. Кульмінацыяй сустрэчы была святая Імша, якую ўзначаліў біскуп Гродзенскі Уладзімір Гуляй.
У гаміліі пастыр Касцёла на Гродзеншчыне, разважаючы над літургічным чытаннем гэтага дня, падкрэсліў, што важна ўзяць свой крыж, нястомна ісці за Богам, дазволіць Яму весці сябе.
“Калі ты выбіраеш шлях за Хрыстом, крыж упісаны ў гэты шлях”, – сказаў іерарх і нагадаў словы Папы Францішка аб тым, што “калі мы адкідваем крыж, то мы людзі зямныя” і “можам быць нават святарамі, біскупамі, але не вучнямі Пана”.
Іерарх дадаў, што трэба браць прыклад з Хрыста – значыць ісці Яго слядамі, па Яго кроках. “Мы павінны браць з Яго прыклад у тым, што Ён рабіў, казаў, як жыў, – адзначыў біскуп. – Не выбіраць якісьці адзін аспект Яго жыцця, які нам найбольш падабаецца… Альбо ты вучань і паслядоўнік Хрыста на сто працэнтаў, альбо не вучань і наогул не бярэш з Яго прыклад”.
Сустрэча завяршылася супольным абедам.
Прэс-служба Гродзенскай дыяцэзіі
