У кляштары сясцёр кармэлітак Дзіцяткі Езуса ў Адамавічах (Сапоцкінскі дэканат) адбыўся дзень засяроджання для дзяўчат. Тэмай абмеркавання быў сакрамэнт хросту.
Праграма сустрэчы ўключала канферэнцыю, святую Імшу, адарацыю Найсвяцейшага Сакрамэнту.
Удзельніцы мелі магчымасць узгадаць, што хрост – пачатак хрысціянскага жыцця чалавека, знак адзінства з Езусам. Яны разважалі над пытаннямі, што дае хрост і што значыць быць ахрышчаным чалавекам.
Адна з удзельніц распавядае: “Было нечаканым адкрыццём, што хрышчэнне багата сімволікай, разважанні над якой могуць даць адказы на пытанні маёй душы: аб тым, як варта жыць, аб пакліканні, аб тым, у чым сапраўдная радасць. Самай кранальнай думкай для мяне стала тое, што хрост – гэта не проста абрад, а перш за ўсё ўваходжанне ў смерць і ўваскрасенне Езуса. Дзякуючы гэтаму сакрамэнту і паглыбленню адносін з Богам кожны чалавек адкрывае сваё пакліканне як прарока ў сваім асяроддзі, святара, які моліцца за блізкага, і караля, спадчынніка Божага Валадарства, сына ці дачкі Бога Айца Усемагутнага.
Мой плён гэтага дня засяроджання – спакой, здабыццё новай перспектывы, з якой я магу глядзець на сваю штодзённасць”.
Прэс-служба Гродзенскай дыяцэзіі
