З 24 па 26 лютага ў будынку былой Вышэйшай духоўнай семінарыі ў Пінску адбылася сустрэча маладых кансэкраваных асобаў пад назвай “Пілігрымы надзеі”.
На сустрэчы сабраліся кансэкраваныя асобы з розных месцаў Беларусі, у тым ліку з тэрыторыі Гродзенскай дыяцэзіі.
Ксёндз Андрэй Рылка правёў для ўдзельнікаў экскурсію па былой семінарыі і катэдральнай святыні, узгадаў цікавыя факты з жыцця беларускіх святых і Божых слугаў – такіх як Андрэй Баболя, Зыгмунт Лазінскі. Асаблівая ўвага ў аповедах была нададзена ганаровай постаці Касцёла на Беларусі – кардыналу Казіміру Свёнтку. Да труны кардынала кансэкраваныя асобы прыйшлі памаліцца і ўзгадаць яго вялікі ўклад у развіццё і захаванне каталіцкай веры на нашых землях.
Са словамі прывітання да прысутных звярнуўся біскуп Пінскі Антоні Дзям’янка.
Пасля адбылося знаёмства з ордэнамі і кангрэгацыямі, да якіх належаць удзельнікі сустрэчы. Кансэкраваныя асобы распавялі пра пачаткі свайго манаскага паклікання, падзяліліся фотаздымкамі і аповедамі з часоў фармацыі.
Таксама адбылася канферэнцыя, з якой выступіў кс. Сяргей Більдзіс SAC. Закранаючы тэму надзеі ў жыцці духоўнай асобы, ён адзначыў: “Наша пакліканне – з надзеяй крочыць за Хрыстом”.
На наступны дзень біскуп Антоні Дзям’янка цэлебраваў святую Імшу для ўдзельнікаў сустрэчы. У сваім слове да іх ён узгадаў гісторыю Касцёла на Палессі.
У той жа дзень кансэкраваныя асобы наведалі музей “Сцежкамі габрэйскай гісторыі”.
Адбылася канферэнцыя “Духоўная і псіхічная інтэграцыя асобы, якая прысвяціла сябе Богу”, з якой выступіла с. Паўла Бобэр. Яна прапанавала ўдзельнікам паглядзець на сваё жыццё праз прызму евангельскіх слоў “Ты Сын Мой умілаваны”.
У канцы дня адбылася адарацыя Найсвяцейшага Сакрамэнту, на якой кансэкраваныя асобы мелі магчымасць даручыць Хрысту свой шлях да святасці і кожны штодзённы крок.
У апошні дзень сустрэчы яны наведалі Краязнаўчы музей гісторыі Палесся.
Перад развітаннем удзельнікі сустрэчы выказалі падзяку яе арганізатарам, асабліва с. Магдаліне Кулай CSCII, якая кіравала справай падрыхтоўкі і правядзення гэтага мерапрыемства, падзяліліся перажываннямі і прапановамі, падвялі вынікі.
С. Дар’я Еўтухоўская FMA, прэс-служба Гродзенскай дыяцэзіі
Фота: с. Міхаліна Маркевіч OP
