26 лютага адбылася сустрэча біскупа Гродзенскага Уладзіміра Гуляя з удзельнікамі евангелізацыйнага курса “Альфа”. Курс на працягу 11 гадоў дзейнічае пры гродзенскім рэктаральным касцёле Звеставання Найсвяцейшай Панне Марыі (пабрыгіцкім).
Біскуп узначаліў святую Імшу, на якой маліўся за ўдзельнікаў курса. У гаміліі іерарх звярнуў увагу на вартасць Божай мудрасці ў служэнні іншым, заклікаў любіць Касцёл і быць вернымі яму.
Пасля літургіі адбылася сумесная вячэра і размова ўдзельнікаў курса з біскупам, у межах якой ён адказаў на іх пытанні. Акрамя таго, іерарх заахвоціў іх быць шчаслівымі людзьмі, якія жывуць з Богам і нясуць святло Евангелля ў сваё свецкае жыццё. Пастыр Касцёла на Гродзеншчыне адзначыў, што хрысціянін пакліканы быць шчаслівым з Богам і сведчыць іншым, што Бог – сапраўднае шчасце чалавека. Ён пажадаў удзельнікам курса штодня прабываць у стане духоўнага шчасця і параўнаў такі стан да гары Перамянення, пра якую гаворыцца ў Святым Пісанні.
У канцы біскуп удзяліў служыцелям евангелізацыйнага курса з іх духоўным кіраўніком кс. канонікам Антоніем Грэмзам пастырскае благаслаўленне на далейшае служэнне жыхарам горада Гродна і ваколіц.
Першая сустрэча курса “Альфа” ў гэтым годзе адбудзецца 12 сакавіка ў 19.00 пры гродзенскім касцёле Звеставання Найсвяцейшай Панне Марыі. Запрашаюцца ўсе жадаючыя, асабліва тыя, хто шукае Бога і жывых адносінаў з Ім.
Прэс-служба Гродзенскай дыяцэзіі
