22 лютага студэнты прапедэўтычнага курса Вышэйшай духоўнай семінарыі ў Гродне са сваім мадэратарам здзейснілі падарожжа па касцёлах Мастоўскага, Слонімскага і Ваўкавыскага дэканатаў.
Першым яны наведалі касцёл Найсвяцейшай Тройцы ў Струбніцы. Семінарысты палюбаваліся драўлянай святыняй з каменным мурам і пазнаёміліся з яе гісторыяй, якую ім распавёў пробашч кс. Генадзь Дабрук. Таксама святар падзяліўся з імі вопытам душпастырства ў невялікай вясковай парафіі. Гэта дало семінарыстам магчымасць задумацца над сутнасцю свайго паклікання, адзначыць для сябе, што святарскае служэнне патрэбна не толькі ў вялікіх гарадах, але і ў маленькіх кутках нашай краіны, а таксама што гэта патрабуе вялікай адданасці.
Затым семінарысты адправіліся ў Вялікія Рагозніцы. Пробашч кс. Томаш Станзецкі пазнаёміў іх з парафіяльнай святыняй, распавёў пра тое, як прыйшоў да святарства і як пачаў служыць у Беларусі, падзяліўся некаторымі звесткамі са свайго жыцця, даў некалькі парадаў, якія могуць дапамагчы будучым святарам у іх служэнні. Семінарысты маглі паназіраць за тым, як у касцёле ідзе рамонт, і пачулі, што плануецца зрабіць яшчэ.
Наступнай у маршруце падарожнікаў была парафія ў Крамяніцы. Семінарысты даведаліся, колькі святароў паходзіць з гэтай парафіі, і выслухалі парады пробашча кс. Аляксандра Баклажца, які ў размове з імі падкрэсліў вялікую неабходнасць ахвярнага служэння людзям і заахвоціў у любой складанай сітуацыі шукаць выхаду ў пакорнай малітве.
У Зэльве семінарысты палюбаваліся неагатычным касцёлам, яго алтарамі, фігурамі і абразамі, пачулі пра складаны лёс гэтай святыні. Пробашч а. Яцэк Маркель CMF у размове з імі адзначыў важнасць гісторыі і неабходнасць цікавіцца ёю.
Апошняй з наведаных была парафія св. Вацлава ў Ваўкавыску. Пробашч кс. Марэк Занеўскі пазнаёміў семінарыстаў з гісторыяй парафіяльнага касцёла і распавёў пра душпастырства. У гэтай парафіі адбыўся абед семінарыстаў, пасля яны падзякавалі Богу за плённае падарожжа.
Яраслаў Булко, прэс-служба Гродзенскай дыяцэзіі
