26 лютага біскуп Гродзенскі Уладзімір Гуляй прызначыў кс. каноніка Валерыя Быкоўскага пробашчам гродзенскай парафіі Беззаганнага Зачацця Найсвяцейшай Панны Марыі (дэканат Гродна-Захад).
Іерарх выказаў падзяку кс. Валерыю Спірыдону, які быў адміністратарам гэтай парафіяльнай супольнасці на працягу некалькіх апошніх месяцаў.
Біскуп удзяліў новапрызначанаму пробашчу пастырскае благаслаўленне на выкананне новых адказных абавязкаў.
Ксёндз канонік Валерый Быкоўскі нарадзіўся 8 жніўня 1979 г. у Гродне, паходзіць з гродзенскай парафіі Маці Божай Анёльскай.
У 2003 г. скончыў Вышэйшую духоўную семінарыю ў Гродне, у 2006 г. – Каталіцкі ўніверсітэт у Любліне (Польшча).
27 верасня 2003 г. у гродзенскім катэдральным касцёле св. Францішка Ксаверыя біскуп Аляксандр Кашкевіч удзяліў яму прэзбітэрскае пасвячэнне.
Быў галоўным рэдактарам газеты Гродзенскай дыяцэзіі “Слова Жыцця”, капеланам турмаў у Гродне і Ваўкавыску, душпастырам моладзі, выкладчыкам у Вышэйшай духоўнай семінарыі ў Гродне і духоўным айцом семінарыстаў.
Быў пробашчам парафій Унебаўзяцця Найсвяцейшай Панны Марыі ў Адэльску (дэканат Гродна-Захад) і Імя Найсвяцейшай Панны Марыі і св. Яна Непамука ў Вялікіх Эйсмантах (Бераставіцкі дэканат). У апошні час служыў у Канадзе.
Прэс-служба Гродзенскай дыяцэзіі
