23 лютага ў касцёле Найсвяцейшага Адкупіцеля ў Гродне біскуп Гродзенскі Уладзімір Гуляй узначаліў Імшу, на якой уручыў дыпломы выпускнікам “Курсаў сямейнага жыцця” пры Канферэнцыі Каталіцкіх Біскупаў у Беларусі.
У літургіі ўдзельнічалі кіраўнікі і слухачы “Курсаў сямейнага жыцця”, а таксама вернікі парафіі.
“Курсы сямейнага жыцця” рыхтуюць сямейных дарадчыкаў, якія могуць дапамагаць пры парафіях, у падрыхтоўцы людзей да сакрамэнту сужэнства, у сямейнай кансультацыі. Сёлета курсы скончылі восем чалавек.
Звяртаючыся да выпускнікоў, біскуп падзякаваў ім за зацікаўленасць дабром сям’і, за рашэнне атрымаць адукацыю ў гэтай галіне і за сведчанне веры ў сваіх сем’ях і на працы.
Іерарх выказаў надзею, што яны праз сваю малітву, служэнне і сведчанне веры прынясуць шмат дабра Касцёлу і дапамогуць тым, хто апынуўся ў крызіснай сітуацыі. Ён заахвоціў выпускнікоў курсаў змяняць да лепшага аблічча сем’яў, дыяцэзіі і краіны.
Кіраўніцтву курсаў біскуп падзякаваў за адданую працу дзеля падрыхтоўкі сямейных дарадчыкаў.
Прэс-служба Гродзенскай дыяцэзіі
