22 лютага ў гродзенскім касцёле Маці Божай Анёльскай прайшла святая Імша з нагоды першай гадавіны смерці кс. каноніка Яна Гавецкага. Цэлебрацыю ўзначаліў арцыбіскуп эмерыт Тадэвуш Кандрусевіч.
Канцэлебравалі літургію біскуп Гродзенскі Уладзімір Гуляй і некалькі прэзбітэраў, прысутнічала шмат вернікаў.
Паколькі ў гэты дзень адзначалася свята катэдры апостала Пятра, арцыбіскуп нагадаў у гаміліі пра значэнне гэтага святога ў гісторыі збаўлення. Іерарх звярнуў увагу на тое, што Пётр быў першым, хто вызнаў веру ў Езуса як Месію, а таксама што Пятру належыць славуты выраз: “Пане, да каго мы пойдзем? Ты маеш словы вечнага жыцця”.
Кажучы пра кс. Яна Гавецкага, іерарх адзначыў, што той, здаецца, паўтарыў сваім жыццём і служэннем гэтыя словы апостала.
Арцыбіскуп нагадаў моманты біяграфіі спачылага святара: той нарадзіўся ў Гродне ў вельмі пабожнай сям’і; быў міністрантам у парафіі Маці Божай Анёльскай; вайсковую службу праходзіў у Каўнасе (Літва), у вольны ад яе час наведваючы касцёл; потым паступіў у каўнаскую семінарыю, якую скончыў у 1990 г. Ксёндз Гавецкі стаў першым святаром, якому ўдзяліў пасвячэнне арцыбіскуп Кандрусевіч.
Пасля некалькіх гадоў служэння ў Літве ксёндз Ян вярнуўся ў Беларусь. Тут ён працаваў у розных парафіях, а найбольшую вядомасць атрымала яго служэнне ў парафіі святых апосталаў Пятра і Паўла ў Іўі. Яго стараннямі каля іўеўскага касцёла была ўсталявана велічная фігура Езуса, які, распасцёршы рукі, нібыта з радасцю запрашае людзей у святыню, каб там яны маглі спаткаць Бога.
Арцыбіскуп нагадаў і пра тое, што з іменем ксяндза Яна звязаны фестываль калядных спеваў “Gloria in excelsis Deo”. Іерарх заўважыў, што гэты фестываль стаў “брэндам іўеўскай парафіі”: кожны год на ім збіраюцца шматлікія мастацкія калектывы, якія, выконваючы калядныя спевы, тым самым адыгрываюць вялікую ролю ў евангелізацыі. Арцыбіскуп дадаў, што фестываль быў адказам ксяндза Яна на прапанову Сіноду Біскупаў, які праходзіў у 2012 годзе: Сінод быў прысвечаны новай евангелізацыі і падкрэсліваў значэнне мастацтва ў перадачы Евангелля ў сённяшні секулярны час.
Таксама арцыбіскуп адзначыў, што ксёндз Гавецкі быў вядомы як арганізатар пілігрымак, у якіх удзельнічала шмат вернікаў, асабліва моладзі. Дзякуючы яго намаганням іўеўская парафія стала любімым месцам “Канікул з Богам”, летам каля парафіяльнага касцёла можна было ўбачыць мноства дзяцей. Шмат увагі святар надаваў дапамозе праз парафіяльнае дабрачыннае таварыства “Caritas” людзям, якія знаходзяцца ў патрэбе.
Святар меў вельмі добрыя адносіны з праваслаўнымі, мусульманамі і юдэямі, чым, па словах арцыбіскупа, прычыніўся да развіцця міжрэлігійнага дыялогу. Іерарх падкрэсліў вялікую заслугу ксяндза Яна ва ўзнікненні помніка “У гонар дружбы і згоды канфесій Іўеўшчыны”. У Беларусі такі памятны знак адзіны, ён знаходзіцца ў цэнтры Іўя і ўяўляе сабой чатыры стэлы – яны прысвечаны католікам, праваслаўным, мусульманам і юдэям.
Арцыбіскуп закрануў таксама тэму значэння святара ў жыцці Касцёла. Ён нагадаў, што Езус даручыў святарам здзяйсняць сакрамэнты, абвяшчаць Божае слова, заўсёды жывое і актуальнае, і кіраваць вернікамі праз служэнне ім. Іерарх дадаў, што без святара Касцёл не зможа выканаць сваю місію, якая заключаецца ў тым, каб быць сакрамэнтам паўсюднага збаўлення.
“Са смерцю ксяндза Яна Касцёл на Гродзеншчыне страціў свайго вернага слугу”, – сказаў арцыбіскуп. Ён дадаў, што смерць святара – напамін пра тое, як важна маліцца аб пакліканнях да святарства і кансэкраванага жыцця, бо колькасць гэтых пакліканняў нізкая, і як важна развіваць адмысловае душпастырства ў галіне пакліканняў.
“Паэт сказаў, што не час шкадаваць ружы, калі гарыць лес. Такім лесам, які ажыўляў духоўнае паветра, быў ксёндз Ян. Праз сваё ахвярнае служэнне ён вёў людзей шляхам збаўлення”, – заўважыў арцыбіскуп.
Іерарх завяршыў гамілію просьбай: “Міласэрны Божа, увядзі ксяндза Яна ў радасць свайго Валадарства, як ён у сваім жыцці вёў людзей да Цябе,”.
Прэс-служба Гродзенскай дыяцэзіі
