Таварыства “Caritas” Гродзенскай дыяцэзіі правяло акцыю “Падорым Раство дзецям”

Дабрачыннае каталіцкае таварыства “Caritas” Гродзенскай дыяцэзіі арганізавала перад святамі Божага Нараджэння дабрачынную акцыю “Падорым Раство дзецям”.

Акцыя праводзілася з мэтай падарыць святы Божага Нараджэння дзецям з абмежаванымі магчымасцямі і дзецям, якія знаходзяцца ў патрэбе. Яна праводзілася ў некалькіх гродзенскіх парафіях, узяць удзел у ёй можна было шляхам набыцця вырабаў з гіпсу і дрэва.

Таварыства “Caritas” дзякуе ўсім людзям добрай волі, асабліва тым, хто прымаў ахвотны ўдзел у гэтай акцыі. “Мы вельмі ўдзячныя за адкрытасць вашых сэрцаў і ахвоту дапамагчы тым, хто знаходзіцца ў патрэбе, – кажуць прадстаўнікі таварыства. – Хочам выказаць шчырыя словы падзякі ўсім удзельнікам акцыі, кожнаму, хто аказваў падтрымку і далучаўся да яе, а таксама нашым супрацоўнікам, валанцёрам, усім ахвярадаўцам, святарам, кожнай парафіі, якая з цеплынёй прымала нас. Бо гэта вялікі скарб, калі мы адкрываем свае сэрцы на Божыя справы і можам дзяліцца сваёй любоўю з іншымі людзьмі”.

Раман Буднік, які вучыцца на прапедэўтычным курсе Міждыяцэзіяльнай вышэйшай духоўнай семінарыі ў Гродне, адзначае: “У сучасным свеце вельмі шмат людзей, якія маюць патрэбу ў нашай дапамозе. Як шмат дзяцей, якія не бачаць простых падарункаў на святы, але пра гэта вельмі моцна мараць. І мы можам у гэтым дапамагчы. Даведаўшыся пра акцыю “Caritas”, я адразу захацеў яе падтрымаць. Цяпер мне 17 гадоў, і я сам, адносна нядаўна, жадаў атрымаць падарунак на Каляды. Доўга чакаў, калі ж народзіцца Хрыстус, каб пад ёлкай знайсці падарунак. А цяпер, калі я пасталеў, хачу, каб іншыя дзеці таксама атрымалі падарунак, як я калісьці”. “Набываючы такія прыгожыя вырабы, – дадае Раман, маючы на ўвазе вырабы, якія прадаваліся ў межах акцыі, – мы ўпрыгожваем свае дамы, але ў першую чаргу дапамагаем гэтым дзецям, збіраем для іх падарункі, тым самым робячы Каляды радасным святам для іх. Вельмі цешыць, што гэтую акцыю падтрымала сярод іншых і моладзь. Вялікія чэргі жадаючых купіць вырабы сведчаць аб тым, што ёсць людзі, якім не абыякавы лёс дзяцей. Няхай кожнае дзіця з радасцю сустрэне Божае Нараджэнне”.

У межах акцыі падарункі між іншым атрымала сацыяльна-дабрачынная ўстанова “Рука дапамогі”, якая садзейнічае павышэнню якасці жыцця дзяцей і моладзі з абмежаванымі магчымасцямі і членаў іх сем’яў, займаецца адаптацыяй, сацыялізацыяй і рэабілітацыяй, аказвае неабходную дапамогу і падтрымку сем’ям. На дадзены момант у яе звяртаецца больш за 60 сем’яў. Дзякуючы акцыі ўдалося закупіць для ўстановы салодкія падарункі і электрычную бегавую дарожку Victory Fit VF-735 для развіваючых заняткаў і падтрымкі фізічнага стану дзяцей з абмежаванымі магчымасцямі. Дырэктар установы Ларыса Санюкевіч выказвае ўдзячнасць таварыству “Caritas”: “Прыемна, што ў нашым асяроддзі ёсць такая арганізацыя і спагадлівыя, добрыя людзі, якія ў ёй працуюць. Шчыра веру, што, каб дапамагчы чалавеку, не трэба быць моцным і багатым – дастаткова быць добрым. Як казаў Марк Твен, “дабрыня – гэта тое, што можа пачуць глухі і ўбачыць сляпы”. Велізарны дзякуй вам за аказаную дапамогу!”

Для дзяржаўнай установы адукацыі “Гродзенскі абласны цэнтр карэкцыйна-развіваючыга навучання і рэабілітацыі” ў межах акцыі былі закуплены бескаркасныя крэслы. Таварыству “Caritas” дзякуе дырэктар установы Алена Федарэнка: “Ваш уклад не толькі зробіць наша жыццё больш камфортным, але і падорыць радасць і ўтульнасць тым, хто ў гэтым мае асаблівую патрэбу. Крэслы-мяшкі стануць сапраўднай крыніцай камфорту і расслаблення для нашых дзяцей. Яны дапамагаюць стварыць бяспечную і прыемную атмасферу, у якой можна адчуваць сябе ўтульна і спакойна. Ваш удзел у гэтай ініцыятыве мае велізарнае значэнне для нас і нашых сем’яў. Мы шчыра цэнім вашу падтрымку і спадзяёмся на далейшае супрацоўніцтва. Разам мы можам зрабіць свет лепшым!”

Таксама ў межах акцыі валанцёры “Caritas” наведалі сем’і, у якіх ёсць дзеці з абмежаванымі магчымасцямі. Валанцёры ўручылі ім падарункі і падзяліліся з імі радаснай весткай аб набліжэнні святаў Нараджэння Пана.

Прэс-служба Гродзенскай дыяцэзіі