8 снежня, у другую нядзелю Адвэнту, арцыбіскуп эмерыт Тадэвуш Кандрусевіч узначаліў Імшу ў парафіі Святога Духа ў Гродне (Альшанка) – самай вялікай парафіі ў горадзе.
Іерарх цэлебраваў літургію па запрашэнні пробашча парафіі кс. каноніка Паўла Салабуды.
У гаміліі арцыбіскуп засяродзіў увагу на значэнні Адвэнту. Іерарх нагадаў, што гэты час прызначаны для чування ў чаканні Хрыста, паколькі людзі не ведаюць, калі Ён прыйдзе, і што гэтае чуванне “павінна быць не камерцыйным, а духоўным”.
“На жаль, Езус са сваім евангельскім радыкалізмам становіцца таксічным для сучаснага чалавека, які ўсё тлумачыць з рацыянальнага пункту гледжання. Езус яму не патрэбны, ён хоча заняць месца Бога і думае, што можа ўсё”, – сказаў арцыбіскуп. Аднак, падкрэсліў ён, трэба жыць боскім жыццём у кожны момант – “гэта азначае цяпер, бо па-за цяперашнім момантам няма рэальнасці: учарашні дзень мінуў і не вернецца, заўтрашні яшчэ не наступіў, адзіная рэальнасць – цяпер, і ў гэтай рэальнасці Бог павінен прысутнічаць сваёй ласкай”.
Па словах іерарха, на авансцэне другой нядзелі Адвэнту знаходзіцца асоба св. Яна Хрысціцеля, пасланага Богам падрыхтаваць дарогу Збаўцу. Разважаючы над евангельскім чытаннем, дзе гаворыцца, што Ян заклікаў засыпаць даліны, зраўняць пагоркі і выпрастаць крывыя дарогі, арцыбіскуп патлумачыў, што маецца на ўвазе дарога да чалавечага сэрца, даліны – сімвал духоўнай пустэчы і адсутнасці малітвы, горы – сімвал пыхі, гневу і эгаізму, крывыя дарогі – сімвал двайнага жыцця, якое дэфармуе хрысціянскую асобу.
“Бог прыходзіць да нас, але часта не заспявае дома ці мы не маем на Яго часу. Стукае ў дзверы нашых сэрцаў, а мы не хочам іх адчыніць. Можа, мы згубілі ключы і не хочам шукаць, бо нам і так добра. Нас задавальняе магчымасць паесці, паспаць і мець доступ да Інтэрнэту”, – з жалем адзначыў іерарх і падкрэсліў, што Адвэнт як час навяртання “павінен спрыяць адмове ад гэтых паталогій духоўнага жыцця, бо найбольшая трагедыя сучаснага чалавека – страта пачуцця граху”.
Па яго словах, заклік Яна Хрысціцеля да пакаяння і навяртання актуальны і сёння, бо “вядзе да акіяну Божай міласэрнасці – адзінай надзеі сучаснага свету”.
Вечарам гэтага дня арцыбіскуп эмерыт узяў удзел у катэхізацыі для дарослых, якая праходзіла ў парафіі, і адказаў на пытанні прысутных, у прыватнасці аб пакліканні да святарства, прэзбітэрскім і біскупскім служэнні.
Прэс-служба Гродзенскай дыяцэзіі
