23 кастрычніка ў парафіі св. Міхала Арханёла ў Белагрудзе (Лідскі дэканат) адбылася святая Імша ў інтэнцыі кс. Рышарда Пэрчака ў 30-ы дзень яго смерці.
Узначаліў літургію біскуп Гродзенскі Уладзімір Гуляй. Шматлікае духавенства і вернікі, якія сабраліся на Імшы, разам прасілі добрага Бога аб дары жыцця вечнага для спачылага, які быў руплівым душпастырам гэтай парафіяльнай супольнасці, дзе служыў з 1997 г.
У гаміліі кс. канонік Валянцін Хвядук, які нядаўна стаў наступнікам спачылага святара – пробашчам белагрудскай парафіі, – прыгадаў розныя гісторыі, звязаныя з зямным жыццём ксяндза Рышарда, і падкрэсліў, што той з вялікай адданасцю служыў Богу, Яго Касцёлу і людзям, да якіх быў пасланы і для якіх заўсёды стараўся быць правадніком у веры.
Пасля Імшы прысутныя накіраваліся на могілкі, дзе месяц таму быў пахаваны ксёндз Рышард. На магіле святара яны прасілі Пана аб вечным жыцці для памерлага.
Ксёндз Рышард Пэрчак нарадзіўся 21 жніўня 1959 г. у Бужысках (Драгічынская дыяцэзія, Польшча) у сям’і Антонія і Зоф’і Пэрчакаў.
У 1986-1991 гг. вучыўся ў Вышэйшай духоўнай семінарыі ў Ломжы (Польшча).
Дыяканскае пасвячэнне прыняў 24 ліпеня 1992 г. у касцёле Перамянення Пана ў Селіванаўцах (Сапоцкінскі дэканат). Прэзбітэрскае пасвячэнне, удзеленае біскупам Гродзенскім Аляксандрам Кашкевічам, прыняў 7 снежня 1996 г. у катэдры св. Францішка Ксаверыя ў Гродне.
Адразу пасля пасвячэння служыў вікарыем у парафіі Спаслання Духа Святога ў Бярозаўцы (Навагрудскі дэканат).
24 лістапада 1997 г. быў прызначаны пробашчам парафіі св. Міхала Арханёла ў Белагрудзе (Лідскі дэканат), дзе служыў да смерці.
Калі ў 2007 г. была ўтворана парафія святых апосталаў Пятра і Паўла ў Дзітве (Лідскі дэканат), стаў яе першым пробашчам. Пад яго кіраўніцтвам там была пабудавана святыня.
Пасля працяглай хваробы адышоў у вечнасць на досвітку 25 верасня, прыняўшы святыя сакрамэнты.
Прэс-служба Гродзенскай дыяцэзіі
