З нагоды пачатку навучальнага года адбылася пілігрымка з Гродна ў Капцёўку

15 верасня адбылася пешая пілігрымка з гродзенскай парафіі Святога Духа на Узгорак надзеі ў Капцёўцы, у санктуарый Маці Божай Яснагорскай, Суцяшальніцы засмучаных.

Пілігрымка па традыцыі здзяйснялася з нагоды новага навучальнага і катэхетычнага года, каб папрасіць Маці Божую аб благаслаўленні на новы перыяд інтэлектуальнай працы і прынесці Ёй свае інтэнцыі.

У пілігрымцы ўдзельнічала амаль 200 чалавек – дзеці, моладзь і дарослыя, вучні, студэнты і настаўнікі з розных гродзенскіх парафій, а таксама студэнты Вышэйшай духоўнай семінарыі ў Гродне.

Пілігрымка пачалася агульнай малітвай у капліцы парафіі Святога Духа (Альшанка). Пробашч парафіі кс. канонік Павел Салабуда благаславіў пілігрымаў у добры і плённы шлях.

У пілігрымцы ўдзельнікі маглі пазнаёміцца, а таксама прыступіць да споведзі, паспяваць песні, якія дапамагалі ім не стаміцца ў дарозе, і памаліцца ў сваіх інтэнцыях.

У Капцёўцы пілігрымаў прывітаў і акрапіў святой вадой кусташ санктуарыя кс. Міхал Ластоўскі. На Эўхарыстыі, якая адбылася затым, святар разважаў у гаміліі над роляй Нябеснай Маці ў жыцці чалавека ў кантэксце Яе сямі балесцяў.

У канцы літургіі было здзейснена благаслаўленне школьных прыладаў. Пасля Імшы ўдзельнікаў пілігрымкі чакалі забавы, абед і танцы.

Прэс-служба Гродзенскай дыяцэзіі