21 жніўня біскуп Гродзенскі Аляксандр Кашкевіч прызначыў дэкана Ашмянскага дэканату.
Гэтая пасада была вакантнай пасля таго, як служэнне ў Ашмянах скончыў ранейшы дэкан, кс. канонік Ян Пузына, прызначаны пробашчам гродзенскай парафіі Адшукання Святога Крыжа.
Новым дэканам стаў пробашч парафіі святых апосталаў Пятра і Паўла ў Граўжышках кс. Павел Раманоўскі.
Ён паходзіць са смаргонскай парафіі св. Арханёла Міхала. Прэзбітэрскае пасвячэнне было ўдзелена яму біскупам Аляксандрам Кашкевічам у гродзенскай базыліцы св. Францішка Ксаверыя 8 лістапада 2014 г.
Біскуп удзяліў ксяндзу Паўлу благаслаўленне на выкананне новых адказных абавязкаў.
Прэс-служба Гродзенскай дыяцэзіі
