19 ліпеня ў касцёле св. Арханёла Міхала ў Смаргоні каад’ютар Гродзенскай дыяцэзіі біскуп Уладзімір Гуляй абвясціў, што рашэннем Папы Францішка кс. канонік Андрэй Зноска, пробашч лідскай парафіі Божай Міласэрнасці, прызначаны дапаможным біскупам Пінскай дыяцэзіі з тытулярным пасадам Скардоны – гістарычнай дыяцэзіі на тэрыторыі сучаснай Харватыі (Скрадзін).
У смаргонскай святыні прысутнічала духавенства і законныя сёстры з навакольных парафій.
Намінат адзначыў, што ў духу паслухмянасці прымае волю Святога Айца, які даручае яму новыя задачы ў Касцёле, і папрасіў аб малітве, каб найлепшым чынам падрыхтавацца да прыняцця біскупскага пасвячэння і быць добрым пастырам для вернікаў, да якіх будзе пасланы.
Прэс-служба Гродзенскай дыяцэзіі
Фота: кс. Артур Ляшнеўскі SDB
