370-годдзе парафіяльнай святыні ў Міхалішках: падзяка за дар веры

22 ліпеня парафія св. Міхала Арханёла ў Міхалішках (Астравецкі дэканат) адзначыла 370-гадовы юбілей свайго касцёла.

У святыні сабраліся сотні парафіян, якія дзякавалі Богу за яе існаванне, за перададзеную ім веру і прасілі аб тым, каб сённяшняя моладзь не страціла гэтай веры і па прыкладзе продкаў захавала яе для нашчадкаў.

Па запрашэнні пробашча парафіі кс. Анатоля Захарэўскага свята ўзначаліў біскуп Гродзенскі Аляксандр Кашкевіч. Таксама на ўрачыстасць прыбылі святары і вернікі з наваколля.

Імшу біскуп цэлебраваў у інтэнцыі ўсіх, хто ўтварае сёння гэтую парафіяльную супольнасць і клапоціцца аб тым, каб святыня і навакольная тэрыторыя былі дагледжаныя і прыгожыя.

Акрамя таго, пастыр Касцёла на Гродзеншчыне маліўся за мінулыя пакаленні вернікаў, якія прычыніліся да ўзвядзення гэтай святыні і збіраліся ў ёй.

Карыстаючыся нагодай, іерарх падзякаваў пробашчу за клопат аб гэтым Божым доме, за руплівае і адданае служэнне сярод парафіян.

Група моладзі прыняла на літургіі сакрамэнт хрысціянскай сталасці, абавязаўшыся адважна вызнаваць веру і паступаць паводле яе.

Касцёл св. Міхала Арханёла быў пабудаваны ў 1653 годзе. Яго фундатарамі былі прадстаўнікі ўплывовага ў тагачаснай Літве заможнага графскага роду Бжастоўскіх, якія валодалі Міхалішкамі з 1604 года.

Будаўнікамі святыні былі італьянскія майстры, якім дапамагалі мясцовыя спецыялісты. Касцёл вылучаецца прыгажосцю размяшчэння (на левым беразе Віліі, у паўночна-ўсходняй частцы вёскі), вонкавым хараством і багаццем унутранага ўбрання ў стылі барока.

Элементы ўбрання і дэкарацый гэтага касцёла неаднаразова падаваліся як узорныя для стылю барока – напрыклад, у альбоме “Польшча ў краявідах і здабытках” 1930 года, у якім з дзесяці найбольш знакамітых твораў барокавага касцёльнага будаўніцтва на дзявятым месцы святыня ў Міхалішках.

Касцёлам і кляштарам апекаваліся законнікі супольнасці рэгулярных канонікаў благаслаўлёных мучанікаў ад Пакуты рэгулы св. Аўгустына (аўгустыяне).

Адзін з сур’ёзных рамонтаў касцёла быў праведзены ў 1944-1945 гадах пасля заканчэння ваенных дзеянняў. Таксама многія працы ў святыні і на тэрыторыі каля яе былі выкананы з таго часу, як пробашчам парафіі стаў кс. Анатоль Захарэўскі.

Прэс-служба Гродзенскай дыяцэзіі

Фота: Віталій Спірыдон