Арцыбіскуп Станеўскі ўдзяліў сакрамэнт канфірмацыі ў Ваўкавыску

13 чэрвеня ў парафіі св. Станіслава Косткі ў Ваўкавыску Мітрапаліт Мінска-Магілёўскі арцыбiскуп Юзаф Станеўскі ўдзяліў сакрамэнт канфірмацыі. Прынялі сакрамэнт 19 чалавек.

У гаміліі арцыбіскуп разважаў над роляй моладзі ў свеце, асабліва ў той час, калі яна, скончыўшы школу, пачынае жыццё ў новым асяроддзі.

Па словах іерарха, сакрамэнт канфірмацыі павінен спрыяць таму, каб кожны хрысціянін па меры свайго жыцця і паклікання станавіўся сведкам Хрыста. Гэта значыць быць сведкам Яго любові, якая не баіцца цярпення, крыжа і нават смерці; любові, якая ніколі не скончыцца, бо заўсёды гатовая прабачыць. Быць сведкам Хрыста – значыць быць сведкам Яго ўваскрасення, маючы ў сабе новае жыццё ў Духу Святым.

У польскай мове этымалогія слова “канфірмацыя” (па-польску “бежмаванне”) паходзіць ад старапольскага bierzmo, што азначае бэльку, якая падтрымлівае столь хаты. Падобным чынам канфірмацыя з’яўляецца сакрамэнтам, які ўмацоўвае жыццё ў веры. Гэты сакрамэнт прымаецца адзін раз у жыцці, але гэта выпрабаванне веры і чалавечага характару, – значыць, што трэба ўмець не толькі вызнаваць веру, але і бараніць яе, перадаваць іншаму.

На заканчэнне святой Імшы іерарх павіншаваў усіх яе ўдзельнікаў і заахвоціў маладых людзей, каб яны “гледзячы – бачылі і ўмелі дзяліцца той любоўю Езуса Хрыста, якую самі спазналі”. Таксама ён даў прысутным “хатняе заданне” – паглядзець усе тры часткі фільма “Бог не памёр”.

Вернікі, якія былі ўзбагачаны дарамі Духа Святога ў канфірмацыі, выказалі словы ўдзячнасці арцыбіскупу, свайму пробашчу кс. Паўлу Звяжынскаму, бацькам і ўсім, хто дапамагаў падрыхтавацца да незвычайнай урачыстасці.

Аксана Вераціла