15 мая ў дыяцэзіяльным санктуарыі Маці Божай Каралевы нашых сем’яў у Тракелях (Радунскі дэканат) прайшла фармацыйная сустрэча для духавенства Гродзенскай дыяцэзіі да пяці гадоў святарства.
На сустрэчы кс. Павел Урбан, пробашч парафіі Маці Божай Нястомнай Дапамогі ў Парэччы (дэканат Гродна-Усход) і віцэ-афіцыял біскупскага суду ў Гродне, разважаў з маладымі святарамі між іншым аб супрацоўніцтве вікарыя з пробашчам.
Цэнтральнай часткай сустрэчы была святая Імша, якую ўзначаліў біскуп Гродзенскі Аляксандр Кашкевіч.
У гаміліі кс. Павел Урбан казаў пра сведчанне святара. Ён адзначыў, што яно вельмі патрэбнае сённяшняму свету, асабліва маладым людзям, якія ў святару хочуць бачыць прыклад святасці і дасканаласці.
У канцы Імшы біскуп Кашкевіч, звяртаючыся да сваіх маладых супрацоўнікаў, звярнуў увагу, што годнасць прэзбітэрату патрабуе ад духоўных асобаў святасці і вернасці, бо Касцёл і ўсе людзі маюць права чакаць ад іх паводзінаў, годных святара.
Іерарх падзякаваў адказным за арганізацыю сустрэчы, асабліва кс. каноніку Паўлу Салабуду, мадэратару пастаяннай фармацыі маладых святароў Гродзенскай дыяцэзіі.
Прэс-служба Гродзенскай дыяцэзіі