16 сакавіка ў будынку Вышэйшай духоўнай семінарыі ў Гродне адбылася сустрэча святарскай рады і дэканаў Гродзенскай дыяцэзіі.
Узначаліў сустрэчу біскуп Гродзенскі Аляксандр Кашкевіч.
На сустрэчы абмяркоўваліся актуальныя справы мясцовага Касцёла. Між іншым удзельнікі абмеркавалі душпастырскую сітуацыю ў святле дыяцэзіяльнай дэмаграфіі і статыстыкі.
Была прадстаўлена інфармацыя на тэму працы І Дыяцэзіяльнага Сіноду, завяршэнне якога плануецца гэтай восенню.
Дэканы і кансультанты абмеркавалі тэму будаўніцтва святыняў на тэрыторыі Гродзенскай дыяцэзіі і тое, якім чынам вернікі дыяцэзіі могуць у ім дапамагчы.
Таксама яны азнаёміліся з праграмай адпустовых урачыстасцяў у дыяцэзіяльным санктуарыі Маці Божай Каралевы нашых сем’яў у Тракелях, якія адбудуцца з 7 па 9 ліпеня, і ўнеслі свае прапановы.
Былі закрануты і іншыя актуальныя пытанні і справы, звязаныя з развіццём душпастырства ў мясцовым Касцёле і асобных парафіях.
Сустрэча завяршылася малітвай аб тым, каб прынятыя рашэнні і пастановы садзейнічалі ажыўленню рэлігійнага жыцця ў дыяцэзіі.
Прэс-служба Гродзенскай дыяцэзіі
