11 лютага ў кляштары сясцёр кармэлiтак Дзiцяткі Езуса ў Адамавічах адбыўся дзень засяроджання для дзяўчат.
Тэмай сустрэчы было запрашэнне Езуса ісці за Ім, перададзенае ў Святым Пісанні словамі: “Калі хочаш быць шчаслівым, ідзі за Мною!”
Духоўным кіраўніком падчас сустрэчы быў ксёндз Уладзіслаў Малышка.
Сваімі думкамі падзялілася адна з удзельніц:
“За свае дваццаць год я ўпершыню пабывала на такім дні засяроджання, які прымусіў мне шмат над чым паразважаць. Калі я ехала ў Адамавічы, то не чакала ад гэтай сустрэчы нічога асаблівага, але менавіта там я атрымала адказы на многія свае пытанні, і не толькі.
Па-першае, яшчэ ніколі і нідзе я не адчувала такога супакою. Мяне ўразіла асаблівая цішыня гэтага месца, дзе я змагла засяродзіцца на малітве, сваіх пытаннях, праблемах, думках. Я нават не ўяўляла, наколькі мне гэта было патрэбна! Я атрымала магчымасць пабыць у цішыні, памаліцца, пагаварыць з Богам і паслухаць Яго голас.
Па-другое, мяне заўсёды хвалявала і абражала, калі людзі навокал не разумелі мяне і гаварылі, што Бога няма. Я ў сваю чаргу заўсёды старалася пераканаць такіх людзей доказамі і словамі, але нічога не выходзіла. Але падчас канферэнцыі я пачула неабходную для сябе думку, якая засталася ў маім сэрцы: “Навошта спрачацца са сцяной, калі яна не перасунецца! Не трэба пераконваць чалавека, калі ён не хоча слухаць. Трэба проста радавацца разам з Езусам і дзяліцца гэтай радасцю з іншымі. Толькі такім чынам я буду здольная штосьці даказаць”.
Апошняе, што мяне захапіла, – гэта прыемная атмасфера, людзі і размовы. Сёстры нагадалі ўсім нам пра важнасць святых сакрамэнтаў і напоўнілі нас натхненнем. Я вельмі ўдзячная Богу, што пазнаёміў мяне з сёстрамі кармэліткамі, якія з адкрытым сэрцам і радасцю прынялі нас. І я ўпэўнена, што гэты дзень і гэтая сустрэча застануцца ў маім сэрцы назаўсёды”.
Прэс-служба Гродзенскай дыяцэзіі