4 снежня ў парафіі св. Міхала Арханёла ў Смаргоні адбылося свята святога Мікалая для дзяцей.
Калі гаварыць пра гэтае свята, дзеці адразу ж думаюць пра падарункі ці пачастункі з мяшка святога Мікалая. Аднак галоўнай асобай у гэты дзень з’яўляецца ён сам, бо гэта яго імяніны.
Свята пачалося Імшой, падчас якой кс. Міхаіл Радзевіч SDB звярнуў увагу на падрыхтоўку сэрцаў людзей да прыходу Езуса Хрыста, асаблівым чынам праз нашыя канкрэтныя крокі падчас Адвэнту, каб зямныя клопаты не перашкаджалі сустрэцца з Езусам.
Працягнулася свята ў араторыі імя св. Яна Боско пры парафіі. Чакаючы святога Мікалая, дзеці сустракалі розных герояў, якія прапаноўвалі ім гульні, і з радасцю забаўляліся.
Дзеці вельмі ўзрадаваліся, калі нарэшце завітаў святы Мікалай. Яны атрымалі падарункі, а на заканчэнне святы нагадаў ім, што вялікім багаццем у жыцці з’яўляюцца нашыя сябры, а не тое, колькі ў нас грошай.
Быў зроблены агульны фотаздымак, пасля чаго кожны меў магчымасць асабіста падысці да святога, прачытаць верш, зрабіць фота і атрымаць сюрпрыз. Сапраўды, калі б святога Мікалая не было – не было б і свята.
С. Валянціна Кот FMA
