16 лістапада Гродзенская дыяцэзія адзначыла ўрачыстасць Найсвяцейшай Панны Марыі Вастрабрамскай, Маці Міласэрнасці. Маці Вастрабрамская ўжо шмат стагоддзяў з’яўляецца Апякункай Вільні, Гродзенскай дыяцэзіі і асабліва парафіі Святога Духа ў Гродне (Альшанка).
Маці Міласэрнасці пакланяюцца не толькі хрысціяне – католікі, праваслаўныя і пратэстанты, – але і веруючыя іншых рэлігій. Яе абраз – гэта сімвал яднання і стойкасці ўсіх людзей.
Аб’ядноўвае Маці і вернікаў парафіі Святога Духа ў Гродне. Яна прысутнічае на Альшанцы ад самага пачатку існавання парафіі. Вернікі гэтага не забываюць і кожны год святкуюць урачыстасць у капліцы.
Сёлета ў дзень урачыстасці перад вячэрняй Імшой у альшанскай парафіі моладзь правяла набажэнства ў гонар Маці Божай. Каля цудадзейнага абраза кожны жадаючы меў магчымасць асабіста падзякаваць Матулі і папрасіць аб заступніцтве перад Богам.
Вячэрнюю Эўхарыстыю ўзначаліў дапаможны біскуп Мінска-Магілёўскай архідыяцэзіі Юрый Касабуцкі, які першы раз наведаў гэтую парафію і прамовіў гамілію да гродзенскіх вернікаў.
Наталля Лазоўская
Фота: Кацярына Русялевіч, кс. Андрэй Струкель