1 кастрычніка, ва ўспамін св. Тэрэзы ад Дзіцяткі Езуса, у парафіі Найсвяцейшага Адкупіцеля ў Гродне (Дзевятоўка) адбылася сустрэча членаў шкаплернага брацтва і тых, хто шануе Маці Божую з гары Кармэль. Сустрэча стала першай пасля летняга перапынку.
Духоўны апякун брацтва а. Аляксандр Стока OCD падчас Імшы распавёў пра духоўнае жыццё святой Тэрэзы, звярнуў увагу на яго этапы.
“Святая Тэрэза захапляе нас сваёй прастатой і дзіцячым даверам Богу, Які ведае нашыя праблемы і клопаты штодзённасці, – адзначыў святар. – Жыць у любові да Бога і бліжняга, выконваючы абавязкі і працу ў глыбокай любові, – гэта пакліканне кожнага да святасці”.
Як нагадаў а. Аляксандр, Папа Ян Павел ІІ казаў пра святую, што яна не напісала тэалагічных твораў, не вучылася ва ўніверсітэтах, а стала доктарам Касцёла, бо глыбока перажывала містычнае з’яднанне з Богам у Духу Святым. Яе духоўны скарб – невычарпальная крыніца Божай мудрасці і прысутнасці ў сэрцы чалавека, дадаў святар.
Пасля Імшы дзевяць новых членаў брацтва прынялі на сябе святы шкаплер Марыі. Такім чынам яны далучыліся да духоўнага скарбу Кармэля, а сям’я тых, хто шануе Маці Божую, павялічылася.
Усе жадаючыя запрашаюцца на чарговую сустрэчу членаў шкаплернага брацтва, якая адбудзецца ў парафіі Найсвяцейшага Адкупіцеля 5 лістапада ў 10.00.
Прэс-служба Гродзенскай дыяцэзіі
