4 верасня, у першую нядзелю месяца, парафію Святога Духа ў Гродне (Альшанка) наведаў біскуп Гродзенскі Аляксандр Кашкевіч. Па традыцыі ў гэты дзень у парафіі адбываецца благаслаўленне школьных прыладаў і афіцыйна пачынаецца навучальны і катэхетычны год.
На пачатку святой Імшы ўсіх прысутных прывітаў пробашч парафіі кс. канонік Павел Салабуда. Ён падкрэсліў, што важней за ўсё пабудаваць жывы Касцёл, святыню з людзей, а не з камянёў.
У гэты дзень святары маліліся за дзяцей і моладзь, якія пачынаюць навучальны год, а таксама за настаўнікаў і за школы, якія знаходзяцца на тэрыторыі парафіі.
На свята завітаў і прэфект Вышэйшай духоўнай семінарыі ў Гродне кс. Ян Раманоўскі, які звярнуўся з Божым словам да самых малодшых удзельнікаў літургіі.
“Біблія – гэта самы галоўны падручнік, па якім мы вучымся ў школе Езуса Хрыста. Таму што тут мы можам навучыцца, як паступаць, як адносіцца да іншых, як сябе паводзіць. Менавіта ў гэтай Кнізе знаходзяцца адказы на ўсе пытанні, якія кожнага з нас цікавяць”, – заўважыў кс. Ян.
Святар падкрэсліў, што “вельмі важна вучыцца ў школе, але не менш важна хадзіць на катэхезу, каб навучыцца жыць так, як нам кажа Езус Хрыстус”.
На заканчэнне Эўхарыстыі біскуп Аляксандр Кашкевіч пажадаў усім дзецям і моладзі руплівасці, стараннасці і сумленнасці ў атрыманні навукі ў школе ці іншай навучальнай установе.
“Жадаю таксама, каб з яшчэ большым запалам і перакананасцю вы наведвалі ўрокі рэлігіі. Няхай пазнанне Езуса Хрыста і Яго навукі будзе для вас праўдзівай патрэбай сэрца, а разам з тым найвялікшай радасцю. Няхай навучальны і катэхетычны год, які распачынаецца, будзе для вас часам развіцця ў мудрасці, у гадах і ласцы ў Бога і ў людзей”, – сказаў іерарх.
Пасля Імшы дзяцей чакалі забавы на свежым паветры, каб з добрым настроем увайсці ў новы навучальны год.
Наталля Лазоўская
Фота: Кацярына Русялевіч, Наталля Лазоўская
