Рэлігійная місія “Дабрачыннае каталіцкае таварыства “Карытас”” Гродзенскай дыяцэзіі ў супрацоўніцтве з сёстрамі Кангрэгацыі Найсвяцейшай Сям’і з Назарэта (назарэтанкі) больш за 25 гадоў паспяхова рэалізуе дабрачынны праект, накіраваны на забеспячэнне людзей, якія знаходзяцца ў патрэбе, бясплатным гарачым харчаваннем. 3 верасня ў Гродне адкрыўся новы сацыяльна-бытавы комплекс для маламаёмных.
На цырымоніі адкрыцця сабраліся жыхары горада, а таксама тыя, хто атрымлівае штодзённыя пасілкі, прыгатаваныя назарэтанкамі. Асвячэнне новага будынка здзейсніў біскуп Гродзенскі Аляксандр Кашкевіч.
З прывітальным словам перад прысутнымі выступіла начальнік упраўлення Гродзенскага гарвыканкама па працы, занятасці і сацыяльнай абароне Ларыса Чэкель, якая выказала радасць з нагоды адкрыцця ў горадзе над Нёманам гэтага аб’екта, які мае важнае значэнне. Ад імя кіраўніцтва горада яна выказала таксама ўдзячнасць дабрачыннаму таварыству і сёстрам назарэтанкам за штодзённы клопат пра бедных і людзей без пастаяннага месца пражывання.
Са свайго боку біскуп Аляксандр Кашкевіч выказаў удзячнасць у адрас старшыні Гродзенскага гарвыканкама Мечыслава Гоя за адкрытасць і за кожную дапамогу. Іерарх пажадаў, каб Пан Бог заўсёды благаслаўляў і атуляў апекай гэтае месца і ўсіх, хто будзе туды прыходзіць.
Новы комплекс дае сацыяльна ўразлівым асобам магчымасць стварыць неабходныя ўмовы жыццядзейнасці. Гэта модульны будынак кантэйнернага тыпу плошчай 85 кв. метраў, які ўключае сталовую, кухонныя і складскія памяшканні, пральню і душавую.
Дзякуючы новаму будынку будзе палепшана якасць паслугаў. Створаны камфортныя ўмовы для наведвальнікаў. У сталовай адначасова можа знаходзіцца 25 чалавек. Былі павялічаны памяшканне для прыгатавання ежы, закуплена дадатковая тэхніка, што таксама палепшыць умовы для працы персаналу, які штодзённа гатуе больш за 100 бясплатных абедаў. З’явіліся дадатковыя памяшканні – душавая і пральня, дзякуючы чаму наведвальнікі змогуць не толькі атрымаць гарачае харчаванне, але і скарыстацца санітарнымі пакоямі.
Прэс-служба Гродзенскай дыяцэзіі