З 29 па 31 ліпеня пры навагрудскім касцёле святога Міхала Арханёла праходзілі рэкалекцыі “Thalita Kum” для моладзі, якая шукае Бога.
Рэкалекцыі правёў кс. Віктар Ханько, удзельнічалі ў іх маладыя людзі ад 16 да 30 гадоў з усёй Беларусі.
Падчас духоўных практыкаванняў закраналіся тэмы пакаяння, прабачэння, пазнання Божай волі і жыцця паводле яе, узаемаадносін і даверу Богу.
У суботу маладыя людзі ўдзельнічалі ў канферэнцыях на розныя тэмы, маглі атрымаць адказы на хвалюючыя пытанні, пачулі сведчанні людзей, якія ішлі да Бога рознымі шляхамі і праз выпрабаванні, заахвочванне да чытання Божага слова, сведчанне веруючай сям’і. Прысутныя ўдзельнічалі таксама ў супольнай Эўхарыстыі і адарацыі Найсвяцейшага Сакрамэнту, прыступілі да споведзі.
У нядзелю, апошні дзень духоўных практыкаванняў, вельмі кранальным момантам стала спецыяльная сустрэча з бацькамі.
На гэтых рэкалекцыях моладзь змагла “падзарадзіць” свае духоўныя “батарэйкі”. Удзельнікі ад’язджалі задаволеныя і абноўленыя, каб сведчыць сваім жыццём пра Бога.
Алена Шмауст
