16 ліпеня маладыя вернікі гродзенскай парафіі Маці Божай Анёльскай (францішканскі касцёл) сталі ўдзельнікамі ўнікальнай культурна-адукацыйнай праграмы “За сцяной кляштара”, арганізаванай Гродзенскім дзяржаўным музеем гісторыі рэлігіі.
Праграма была вельмі насычанай. У яе межах адбылася экскурсія па выставе “Схаваныя старонкі манаскага жыцця”, затым прагляд выставы “Што такое каталіцтва?”, якая дзейнічае пастаянна.
На экскурсіі ў музеі ўдзельнікі даведаліся шмат пра манаскія ордэны і іх заснавальнікаў, а таксама вучыліся пісаць пяром малітву.
Экскурсія працягвалася ў францішканскім касцёле. Удзельнікі пачулі яго гісторыю, а таксама гучанне самага старадаўняга ў Беларусі аргана. Моладзь парафіі паказала ўсім прысутным тэатральную пастаноўку, прысвечаную памяці св. Максімільяна Марыі Кольбэ, які ўсё жыццё служыў тым, хто знаходзіцца ў патрэбе, і распавяла пра яго дзяцінства і юнацтва.
Прысутным распавялі з асаблівым гонарам пра тое, як у 1922-1927 гадах святы Максімільян Кольбэ служыў у гродзенскім францішканскім касцёле. Пры кляштары францішканаў ён заснаваў выдавецтва “Рыцара Беззаганнай”.
Прэс-служба Гродзенскай дыяцэзіі
