Парафіяда дзяцей і моладзі стартавала ў Гродне

27 чэрвеня ў парафіі Найсвяцейшага Адкупіцеля ў Гродне (Дзевятоўка) пасля двухгадовага перапынку, выкліканага пандэміяй, распачалася 12-я Парафіяда дзяцей і моладзі Гродзенскай дыяцэзіі. Cустрэча, якая складаецца з трыяды “святыня – тэатр – спорт”, сабрала дзяцей і моладзь з 25 парафій Гродзенскай дыяцэзіі і парафіі Найсвяцейшай Тройцы ў Глыбокім (Віцебская дыяцэзія).

У двухдзённай сустрэчы ўдзельнічае ў цэлым 217 чалавек.

Ксёндз Артур Малафей, дырэктар парафіяды і адказны за спорт у Гродзенскай дыяцэзіі, прывітаў усіх удзельнікаў, а таксама тых, хто падтрымлівае гэтае мерапрыемства матэрыяльна.

Распачалася парафіяда святой Імшой, якую ўзначаліў біскуп Гродзенскі Аляксандр Кашкевіч. Гамілію прамовіў а. Анджэй Ядкоўскi CSsR, пробашч парафіі, якая ў гэтым годзе прымае ўдзельнікаў.

Рэдэмптарыст адзначыў, што ў гэты дзень іх парафіяльная супольнасць святкуе ўрачыстасць Маці Божай Нястомнай Дапамогі, абраз якой знаходзіцца ў бакавым алтары святыні. Таму ён заахвоціў прысутных запрасіць Марыю, якая поўная ласкі, у сваё жыццё, каб разам з Ёю ствараць сваю будучыню і кожны дзень зноў аддавацца ў Яе мацярынскую апеку.

Затым адбылося ўрачыстае адкрыццё сустрэчы: у святыню быў унесены сцяг парафіяды.

Кс. Юрый Марціновіч

Фота: Вольга Сяліцкая