З 6 па 17 чэрвеня ў парафіі Святой Сям’і ў Лідзе адбыліся “Канікулы з Богам” – перыяд летняга адпачынку для дзяцей і моладзі пры парафіі, падчас якога ўдзельнікі не толькі забаўляліся, але і здабывалі некаторыя рэлігійныя веды і вучыліся праводзіць час з Богам.
Праграма адпачынку была вельмі насычанай. Кожны дзень дзеці распачыналі з малітвы ў парафіяльнай святыні. Пасля невялікай размінкі ўдзельнікі разыходзіліся на працу ў групах.
Кожны дзень дзеці разам з апекунамі рыхтаваліся да ўдзелу ў розных конкурсах: малюнку, танцу, песні, тэатру. Праца ў групах разбаўлялася спартыўнымі гульнямі і спаборніцтвамі. У вельмі цёплыя дні дзеці выходзілі на забавы ў лес.
Некалькі разоў хадзілі на прагляд фільма ў кінатэатр, штодня слухалі катэхезы, разважаючы над прыпавесцямі і цнотамі, маліліся Вяночак да Божай Міласэрнасці, вывучалі рэлігійныя песні.
17 чэрвеня адбылося заканчэнне “Канікул з Богам”. На святой Імшы дзеці памаліліся аб Божым благаслаўленні на далейшы час летняга адпачынку. Пазней іх чакалі забаўляльная праграма, падрыхтаваная аніматарамі, і салодкі пачастунак.
Андрэй Юхнік