11-12 чэрвеня ў дыяцэзіяльным санктуарыі Маці Божай Каралевы нашых сем’яў у Тракелях (Радунскі дэканат) сустрэліся прадстаўнікі Францішканскага ордэну свецкіх з усёй Беларусі.
На працягу ночы духоўныя дзеці св. Францішка Асізскага маліліся ў санктуарыі перад выстаўленым Найсвяцейшым Сакрамэнтам.
Малітву яны ахвяравалі ў інтэнцыі Каталіцкага Касцёла ў нашай краіне, за беларускія сем’і, каб тыя былі моцныя Богам, і аб развіцці дзейнасці сваёй супольнасці ў Беларусі.
Сустрэча завяршылася святой Імшой, якую ўзначаліў арцыбіскуп эмерыт Тадэвуш Кандрусевіч.
У гаміліі арцыбіскуп звярнуў увагу, што члены свецкіх супольнасцяў пакліканы практыкаваць адмысловую законную духоўнасць без бачных знакаў прыналежнасці да законнай супольнасці і маюць магчымасць ісці туды, куды святар або законнік ісці не можа. Іерарх назваў гэта вельмі важным у сённяшні секулярны час.
Па словах арцыбіскупа, беларускія тэрцыярыі прыбылі ў гэты дзень да Божай Маці Тракельскай, каб дзякаваць Пану за пакліканне, аднавіць і паглыбіць такое патрэбнае ў Касцёле служэнне свецкіх паводле харызмы святога Францішка, набыць новы дух і энергію.
Іерарх падкрэсліў, што сучаснаму свету, дзе мноства падзелаў у сем’ях, грамадствах, мноства нянавісці і гвалту, патрэбна адзінства і ўзаемная любоў, якія існуюць у Найсвяцейшай Тройцы. “Мы не ўмеем бачыць у іншым чалавеку свайго брата і сястру. Таму застаемся ў жыццёвай цемры”, – дадаў ён.
Арцыбіскуп адзначыў, што дасягненне адзінства патрабуе ўзаемнага прабачэння, і назваў актуальным дэвіз святога Францішка і яго духоўных паслядоўнікаў: “Супакой і дабро”. Іерарх дадаў, што не будзе міру і справядлівасці без даверу Богу, без жыцця ў праўдзе і любові, таму важна памятаць словы Езуса: “Будзьце дасканалымі, як дасканалы ёсць ваш нябесны Айцец”.
Арцыбіскуп заклікаў беларускую супольнасць тэрцыярыяў браць прыклад з Найсвяцейшай Тройцы, Марыі і ў духу вернасці харызме святога Францішка дапамагаць людзям імкнуцца да дасканаласці ў любові, якая творчая і будуе новы справядлівы свет.
На заканчэнне сустрэчы кусташ санктуарыя кс. канонік Юрый Бяганскі падзякаваў членам Францішканскага ордэну свецкіх за ўдзел і запрасіў на сёлетнія адпустовыя ўрачыстасці ў Тракелях, таксама заахвоціўшы наведваць святыню ў любы іншы час.
Прэс-служба Гродзенскай дыяцэзіі
Фота: кс. Павел Эйсмант