Пры дэканальным санктуарыі Божай Міласэрнасці ў Воранаве (Радунскі дэканат) адбыўся майстар-клас па вырабе святочных пернікаў.
Майстар-клас, у якім удзельнічалі дзеці і моладзь воранаўскай парафіі, правялі спецыяльна запрошаная госця з Мінска Алеся Іванова, а таксама сястра Наталля Дрэма SAC, якую дзякуючы яе артыстычным здольнасцям ведаюць не толькі ў гэтай парафіі, але і далёка за яе межамі.
Мэтай заняткаў было пазнаёміць маладых парафіян з традыцыямі і гісторыяй, звязанымі з вырабам святочных пернікаў. Дзеці і моладзь маглі ўласнаручна прыгатаваць пернікі і аздобіць іх паводле свайго густу.
Удзельнікі сустрэчы ўдзячныя пробашчу парафіі кс. Андрэю Вітэку SAC за магчымасць сабрацца на гэтай адвэнтавай акцыі, якая стала добрай падрыхтоўкай да святаў Божага Нараджэння.
Прэс-служба Гродзенскай дыяцэзіі
