18 лістапада прадстаўнікі Рэлігійнай місіі “Дабрачыннае каталіцкае таварыства “Карытас”” на чале з дырэктарам кс. доктарам Раманам Рачко перадалі першую партыю гуманітарнай дапамогі ад Гродзенскай дыяцэзіі бежанцам на беларуска-польскай мяжы.
Цёплае адзенне і сродкі гігіены, якія былі дастаўлены ў транспартна-лагістычны цэнтр, дзе зараз прабываюць мігранты, будуць размеркаваны сярод патрабуючых.
Гэтыя рэчы былі сабраны ў парафіях Гродзенскай дыяцэзіі. Вернікі, дапамагаючы мігрантам без увагі на абставіны іх прыбыцця, не могуць заставацца абыякавымі да драмы чалавечага цярпення, бо маральны абавязак кожнага хрысціяніна – уключыцца ў справу дапамогі тым, якія апынуліся ў цяжкай сітуацыі.
Належыць падкрэсліць, што ў каталіцкіх святынях Гродзенскай дыяцэзіі працягваюць узносіцца малітвы ў інтэнцыі мігрантаў, якія знаходзяцца на беларуска-польскай мяжы, і за ўсіх, ад каго залежыць вырашэнне гэтага гуманітарнага крызісу.
Вернікі просяць добрага Бога, каб складаная сітуацыя была як найхутчэй вырашана мірным шляхам, з пашанай да жыцця і годнасці кожнага чалавека.
У далейшым можна падтрымаць мігрантаў, перасылаючы свае ахвяраванні на рахунак Рэлігійнай місіі “Дабрачыннае каталіцкае таварыства “Карытас”” Гродзенскай дыяцэзіі:
УНП 500160938
ОКПО 2886022
дабрачынны рахунак у беларускіх рублях
BY06 PJCB 3135 6031 8900 2000 0933
ААТ «Приорбанк» ЦБУ 600 г. Гродна
Код PJCBBY2X
Біскуп Гродзенскі Аляксандр Кашкевіч выказвае ўдзячнасць усім вернікам за спаўненне евангельскага абавязку дапамогі патрабуючым і за асабістае ўключэнне ў арганізаваную дабрачынную акцыю.
Прэс-служба Гродзенскай дыяцэзіі
