Дзеці самай маладой гродзенскай парафіі разважалі пра святасць на “канікулах з Богам”

6 лістапада для дзяцей гродзенскай парафіі благаслаўлёнай Мар’яны Бярнацкай былі арганізаваны аднадзённыя “канікулы з Богам”.

Падчас сустрэчы, якая ў гісторыі маладой парафіі праходзіла ў такім фармаце ўпершыню, удзельнікі разважалі на тэму святасці, а таксама над тым, якія ўчынкі трэба здзяйсняць, каб дасягнуць неба.

У праграме была Эўхарыстыя, на якой дзеці маліліся за ўсіх сваіх блізкіх. Яны агарнулі малітвамі і ўсіх тых, хто ў гэты час зведвае цярпенне з-за хваробы ці гаспіталізацыі.

Наймалодшыя вернікі асабліва маліліся ў інтэнцыі сваёй парафіяльнай супольнасці, просячы Пана Бога, каб з Яго дапамогай ёй удалося рэалізаваць усе свае намеры і планы – у першую чаргу па будаўніцтве ўласнай святыні.

У праграме дня, падрыхтаванай катэхеткай сястрой Ленай разам з памочнікамі, было таксама шмат забаваў, падчас якіх дзеці мелі магчымасць інтэграцыі і знаёмства паміж сабой.

Сустрэчу дзеці пакідалі з перакананнем, што святасці мы вучымся не ў небе, а на зямлі. Таму арганізатары чакаюць, што гэтыя “канікулы з Богам” стануць для маленькіх парафіян наступнай прыступкай на гэтым шляху.

Прэс-служба Гродзенскай дыяцэзіі