Aрцыбіскуп Кандрусевіч ва ўспамін усіх памерлых у Гродне: могілкі – найлепшы прыклад імкнення да міру

2 лістапада, ва ўспамін усіх памерлых вернікаў, Мітрапаліт Мінска-Магілёўскі на пенсіі арцыбіскуп Тадэвуш Кандрусевіч цэлебраваў Эўхарыстыю на могілках, якія знаходзяцца непадалёк ад “Гродна Азот”, аднаго з буйнейшых прадпрыемстваў Беларусі. На гэтых могілках таксама пахаваны яго блізкія.

На малітве сабраліся вернікі, якія прыйшлі найперш наведаць магілы сваіх блізкіх, пахаваных там, а таксама падчас гэтай Імшы памаліцца за іх.

У гаміліі арцыбіскуп засяродзіўся на праўдзе смерці, якая чакае кожнага з нас, і праблеме падрыхтоўкі да яе, бо яна можа прыйсці нечакана.

Ён заклікаў да малітвы ў інтэнцыі памерлых, бо толькі мы можам ім дапамагчы. “Час іх заслугаў перад Богам і людзьмі завяршыўся, і яны, бездапаможныя, у чыстцы чакаюць ачышчэння ад лёгкіх грахоў і караў за правіны”, – дадаў іерарх.

Aрцыбіскуп падкрэсліў, што калі мы молімся за памерлых, то выпрошваем для іх у Бога міласэрнасць і адначасова заслугоўваем Яго міласэрнасць адносна нас у будучыні, бо і нам трэба будзе стаць перад Богам-суддзёй. Нездарма Езус кажа, што міласэрныя спазнаюць міласэрнасць.

Таксама іерарх адзначыў, што ўрачыстасць Усіх Святых і ўспамін усіх памерлых вельмі добра прадстаўляюць праўду аб еднасці святых. Касцёл, які пілігрымуе і які ўтвараюць жывыя людзі, яднаецца ў малітве з Касцёлам, які церпіць і ачышчаецца – Касцёлам тых, хто ў чыстцы, – і Касцёлам тых, якія трыумфуюць, што на нябёсах. Мы дапамагаем душам чыстцовым перайсці ў радасць вечнага шчасця і гэтым самым павялічваем колькасць святых, якія хадайнічаюць за нас перад Богам і з якіх мы павінны браць прыклад у нашай пілігрымцы да неба.

Акрамя таго, арцыбіскуп заклікаў прысутных шанаваць годнасць кожнага чалавека і імкнуцца да згоды паміж людзьмі, чаго так патрабуе наша грамадства. Па яго словах, могілкі з’яўляюцца найлепшым прыкладам імкнення да міру, зямля аб’яднала ўсіх: веруючых і няверуючых, маладых і старых, вучоных і простых людзей, кіраўнікоў і падуладных, яна аднолькавая для ўсіх. Таксама і мы, сказаў іерарх, павінны памятаць, што маем адну Айчыну і нам няма чаго дзяліць паміж сабой, наадварот, неабходна імкнуцца да так патрэбнага адзінства, якое магчымае ў духу ўзаемнай любові, пашаны і прабачэння.

Пасля Імшы арцыбіскуп узначаліў жалобную працэсію па могілках. Працэсія спынялася на пяці стацыях, каб даручаць Богу ўсіх тых, якіх ужо няма сярод нас.

Кс. Юрый Марціновіч