У гэтыя дні завяршае сваё служэнне ў Гродзенскай дыяцэзіі арцыбіскуп намінат Юзаф Станеўскі, які на працягу апошніх гадоў быў у ёй дапаможным біскупам і генеральным вікарыем.
“Спадабалася Богу” паслаць іерарха да супольнасці Касцёла Мінска-Магілёўскай архідыяцэзіі. Таму ўжо праз некалькі дзён ён кананічна ўзначаліць яе, урачыста ўвойдзе ў старадаўнюю архікатэдру і будзе пазнаваць багатую гісторыю і прыгажосць мясцовага Касцёла.
На парозе новых адказных справаў, якія былі даручаны арцыбіскупу намінату Юзафу Святым Айцом Францішкам, ад імя ўсіх наведвальнікаў нашага сайта, а таксама супрацоўнікаў аддзела сродкаў масавай інфармацыі Гродзенскай дыяцэзіі мы хацелі б перадаць яму самыя сардэчныя віншаванні і сказаць простае чалавечае дзякуй.
Шаноўны арцыбіскуп намінат!
Дзякуем за адкрытае сэрца, заўсёды добрае слова, усмешку на твары…
Дзякуем за веру, якой з намі дзяліліся і якую вынеслі са свайго роднага дому ў Заневічах, атрымаўшы ад сваіх высакародных бацькоў.
Дзякуем за тое, што ўказвалі сваім служэннем на любоў Хрыста і вучылі яе заўважаць, а таксама за адкрытасць на розныя душпастырскія ініцыятывы ў нашым лакальным Касцёле.
Мы перакананыя, што не пакінеце нашу супольнасць, бо нельга парваць каранёў. Гэтыя карані, глыбока пагружаныя, будуць і далей чэрпаць моц з гэтай зямлі, з гэтага шматгадовага досведу.
Ваша Эксцэленцыя, хочам пажадаць, каб на новым месцы, у нашай сталіцы, Вам было добра. Каб пастырскае служэнне прыносіла шчодрыя плёны. Няхай у штодзённым душпастырстве спадарожнічае Божая ласка і няхай заўсёды будзе блізка нашая міласэрная Маці і Каралева, якая чувае над нашым Касцёлам, кожнай сям’ёй і кожным нашым домам.
Глыбока верым, што Ваш багаты досвед і асабістыя якасці дапамогуць у выкананні даручаных задач з вялікай разважлівасцю, мудрасцю і любоўю да Бога і Касцёла!
Божага благаслаўлення!
З дарам малітвы
наведвальнікі сайта і супрацоўнікі аддзела сродкаў масавай інфармацыі Гродзенскай дыяцэзіі