8 верасня парафія ў Зарачанцы (Сапоцкінскі дэканат) адзначала штогадовую адпустовую ўрачыстасць Нараджэння Найсвяцейшай Панны Марыі.
На адпустовай Імшы ў касцёле сабраліся шматлікія парафіяне, а таксама госці. Прыбылі святары і сёстры законныя з дэканату.
Усіх прысутных на літургіі прывітаў пробашч парафіі кс. прэлат Вітальд Лазавіцкі, які ўзначаліў Эўхарыстыю. У гэты дзень святар дзякаваў Богу за 65 гадоў жыцця.
У гаміліі канцлер біскупскай курыі ў Гродне кс. канонік Аляксандр Мацкевіч заахвоціў прысутных на ўзор Марыі станавіцца перад Богам з поўнымі прыгаршчамі зярнятаў дабра і любові, а таксама прасіць Пана благаславіць усіх на трываласць у спаўненні Яго волі.
На заканчэнне Імшы парафіяне выказалі віншаванні свайму рупліваму душпастыру, які служыць у іх святыні чатыры гады. Дзякуючы Пану за служэнне кс. Вітальда Лазавіцкага ў парафіі, яны жадалі святару, каб ён і далей мог ахвярна служыць ім і вучыць любіць Усемагутнага Бога і людзей.
Урачыстасць завяршылася эўхарыстычнай працэсіяй вакол святыні.
Кс. Юрый Марціновіч
Фота: Аліцыя Габіс