21 жніўня пры касцёле святога Казіміра ва Уселюбе адбыўся першы хрысціянскі фестываль “Novafest”. Тэмай фестывалю было праслаўленне Бога “ў Духу і праўдзе” (Ян 4, 23).
Напэўна, Пан Бог не проста так выбраў мястэчка Уселюб (слова паходзіць ад “усіх любіць”) як месца Яго праслаўлення.
Удзельнікі фестывалю, якія прыбылі з Мінска, пачалі адчуваць праявы Божай любові з самага пачатку дня. У Мінску ліў дождж, а калі госці фестывалю набліжаліся да Уселюба, неба адкрывалася ад хмар, а над мястэчкам свяціла яркае сонца. Удзельнікі падымаліся ў гару (касцёл размяшчаецца на ўзвышэнні), на самую высокую кропку гэтага месца.
Урачыстая частка фестывалю пачалася з габрэйскіх песень праслаўлення, перакладзеных на беларускую мову спецыяльна для фестывалю. Бо Бог выбраў народ Ізраэля як Свой народ, а хто, як не Яго народ, лепш за ўсё ведае, як праслаўляць Яго?
“Слухай, Ізраэль…” – такі пасыл быў зададзены не толькі ў песнях, але і ў разважаннях гэтага дня. Ксёндз Яўген Шымановіч з Глыбокага правёў канферэнцыю на тэму сапраўднага праслаўлення, патлумачыўшы сутнасць старазапаветнага праслаўлення Бога Ізраэля і пакланення Айцу ў духу, які фармуе ў нас сам Бог, нават тады, калі нам вельмі нялёгка ісці па жыцці.
Сведчанні людзей аб сваім навяртанні да Бога, іх пакаянні ў грахах і перамяненне іх жыцця з Богам не пакінулі прысутных абыякавымі. Праз гэтыя сведчанні Пан дакрануўся на фестывалі да кагосьці, каму гэтыя сведчанні былі патрэбныя.
Сведчанні прадстаўнікоў свецкіх хрысціянскіх рухаў у Касцёле ў Беларусі ўзрушвалі сваёй важнасцю і значнасцю ў справе прапаведавання Евангелля, навяртання, пакаяння. Бо святары і Касцёл не заўсёды могуць дайсці да ўсіх сфер свецкага жыцця, каб данесці добрую вестку. Абарона жыцця і малітва ў абартарыях, прапаведаванне каштоўнасці чалавечага жыцця для жанчын, якія вырашылі зрабіць аборт, – гэта місія дабрачыннага фонду “Адкрытыя сэрцы” ў Магілёве і Віцебску. Малітва маці за сваіх дзяцей, пачынаючы з іх нараджэння, – важны аспект у фарміраванні новага чалавека. Маці адчуваюць сябе больш упэўнена, калі давяраюць сваіх дзяцей і іх будучыню Богу і апецы Панны Марыі (рух “Маці ў малітве”). Адзінства з Богам і пакланенне Яму ў Найсвяцейшым Сакрамэнце, перажыванне паўнаты адзінства з Богам у сям’і, у адносінах з іншымі людзьмі, у працы і фінансах – гэтую тэму развівае рух “Эхад” з Гродна. Воіны Найсвяцейшай Багародзіцы – такі эпітэт больш за ўсё падыходзіць “Легіёну Марыі”, бо яны працуюць на ніве прапаведавання Збаўлення ў самых цяжкіх месцах – небяспечных мікрараёнах, бальніцах, начлежках для бяздомных. Усіх гэтых людзей і ўдзельнікаў гэтых рухаў аб'ядноўвае любоў да Бога і жаданне несці Яго ў кожны дом, кожнаму чалавеку.
У Даліне блакітных крыжоў прайшоў Крыжовы шлях, падчас якога больш за трыста гасцей фестывалю прайшлі 14 стацый шляху Хрыста на Галготу, разважаючы над паўсядзённымі цяжкасцямі розных аспектаў грамадскага і асабістага жыцця. Бо няма такога болю і такой праблемы, якія б не былі вядомыя Хрысту, які прайшоў Крыжовы шлях.
У межах духоўнай праграмы фэсту госці маглі пазнаёміцца з гісторыяй новага благаслаўлёнага ў Каталіцкім Касцёле – Карло Акуціса, чыя любоў да Езуса ў Эўхарыстыі натхняе і ўсяляе надзею, што “Эўхарыстыя – гэта аўтастрада на Неба” і што стаць святым рэальна.
Фестываль працягнуўся Меджугорскім Ружанцам са спевамі і адарацыяй Найсвяцейшага Сакрамэнту. Пасля таго, як святар благаславіў усіх удзельнікаў адарацыі манстрацыяй з Целам Езуса, раптам лінуў цёплы летні дождж, які стаў для прысутных сапраўдным благаслаўленнем з нябёсаў. Хоць усе і паспрабавалі схавацца ў касцёле ад дажджу, касцёльная вежа была асветлена ружовым зарывам і аздоблена вясёлкай, а ў воблаку над святыняй раптам закружыла чарада буслоў, якая ляцела па небе.
Завяршыўся фестываль супольнай песняй “Блаславенне”, калі ўсе ўдзельнікі запалілі свечкі як сімвал святла Хрыста, які яны павязуць дадому, і разам з музыкамі паўтаралі словы песні: “Хай блаславіць цябе Госпад, хай святлом Сваім асветліць і захоўвае цябе. Хай адкрые Сваё аблічча і падорыць мір!”
Святлана Герасімовіч
Фота: Алена Казловiч, Дар'я Шур