Парафіяльны фэст з удзелам біскупа Гродзенскага адзначылі ў Сапоцкіне

16 Жніўня 2021

15 жніўня парафія ў Сапоцкіне адзначала адпустовую ўрачыстасць Унебаўзяцця Найсвяцейшай Панны Марыі. У гэты дзень вернікі таксама дзякавалі Богу за сёлетнія плёны, якія дала зямля.

Урачыстую адпустовую Імшу цэлебраваў біскуп Гродзенскі Аляксандр Кашкевіч у інтэнцыі парафіяльнай супольнасці: святароў, сясцёр законных і вернікаў.

У гаміліі іерарх заахвоціў засяроджана ўглядацца ў Хрыста, як углядалася ў Яго Марыя.

Біскуп заклікаў захоўваць і аберагаць каталіцкія і сямейныя каштоўнасці. “Добра, што не паддаецеся магічным сілам рэкламы, моды, крыклівага зла, якое заглушае дух і нашу радасць у Пану”, – дадаў ён.

На заканчэнне гаміліі пастыр Касцёла на Гродзеншчыне пажадаў, каб Унебаўзятая Марыя “дапамагала ўсім захаваць твар Божых дзяцей”.

У працэсіі з дарамі прадстаўнікі вуліц і вёсак прынеслі да алтара ўласнаручна зробленыя дажынкавыя вянкі. Такім чынам яны падзякавалі Богу за сёлетнія плёны, а таксама прасілі, каб Пан захаваў нашу зямлю ад голаду, каб на кожным стале было ў дастатку хлеба.

Урачыстасць завяршылася эўхарыстычнай працэсіяй вакол святыні.

Пробашч парафіі кс. Антоні Абухоўскі выказаў усім удзячнасць за прысутнасць і супольную малітву, a біскупу – за тое, што ён узначаліў сёлетнюю ўрачыстасць.