У межах адпустовых урачыстасцяў у санктуарыі Маці Божай Каралевы нашых сем’яў у Тракелях была арганізавана канферэнцыя, прысвечаная асобе св. Юзафа, абранніка Найсвяцейшай Панны Марыі і апекуна Пана Езуса.
Зараз у Каталіцкім Касцёле праходзіць Год св. Юзафа, які ўстанавіў Папа Францішак 8 снежня 2020 г., ва ўрачыстасць Беззаганнага Зачацця Найсвяцейшай Панны Марыі. Дата абвяшчэння гэтага года была невыпадковай, бо 150 гадоў таму, 8 снежня 1870 г., благаслаўлёны Пій ІХ абвясціў св. Юзафа апекуном Каталіцкага Касцёла.
На асобе гэтага святога, які дапамагае чалавецтву і вучыць яго перажываць цяжкасці, не сумняваючыся ў прысутнасці Бога ў штодзённым жыцці, сабраным дапамог засяродзіцца а. Ежы Саковіч, паўлін.
Законнік адзначыў, што перш чым Юзаф дасягнуў вышыні святасці, яму трэба было прайсці праз многія выпрабаванні веры, а сёння ён заахвочвае сучасных людзей прыняць Пана Езуса ў сваё жыццё.
Святар падкрэсліў, што прыняць Бога азначае стварыць для Яго ў сваім жыцці адпаведныя ўмовы: гэта стан асвячальнай ласкі, давер Хрысту і Яго планам на нашае жыццё, а таксама адказ “не” злу і граху.
Год св. Юзафа завершыцца 8 снежня 2021 г. У Апостальскім лісце Patris Corde Папа Францішак піша, што жаданне падзяліцца асабістымі разважаннямі, якія датычаць асобы і справаў Юзафа, выспявала ў яго асабліва ў апошнія месяцы, пазначаныя наступствамі пандэміі.
Гэты час дазволіў адчуць, што “наша жыццё саткана і падтрымліваецца простымі людзьмі – якіх звычайна забываюць, – якія не выступаюць ні ў загалоўках газет і часопісаў, ні на вялікай сцэне апошняга шоў, але, несумненна, пішуць сёння рашаючыя падзеі на старонках нашай гісторыі”.
Кс. Юрый Марціновіч
Фота: Вольга Сяліцкая
