Велікодная радасць Кангрэгацыі сясцёр св. Кацярыны Александрыйскай была ўзмоцнена тым, што тры сястры, у тым ліку адна з Беларусі, прынеслі ў Браневе (Польшча) вечныя манаскія абяцанні.
Беларуска сястра Аўгустына Белагрывая, якая была сярод іх, паходзіць з парафіі св. Казіміра, каралевіча, у Ліпнішках (Іўеўскі дэканат).
Згодна з дэвізам заснавальніцы іх супольнасці, благаслаўлёнай Рэгіны Протман, такім чынам сёстры адказалі ў гэты важны для іх дзень: “Як Бог хоча!”
Урачыстая літургія з прынясеннем манаскіх абяцанняў адбылася ў Браневе невыпадкова, бо тут нарадзілася і жыла бл. Рэгіна. Таму для сясцёр кацярынак гэтае месца з’яўляецца калыскай іх кангрэгацыі, якая сёлета адзначае юбілей 450-годдзя існавання.
Благаслаўлёная паходзіла з заможнай сям’і, аднак у 19-гадовым узросце запалала жаданнем служыць Пану і дзякуючы Божаму Провіду ў 1571 г. заснавала кангрэгацыю, аддаючы яе законніц асаблівай апецы св. Кацярыны Александрыйскай.
Падчас святой Імшы манахіні атрымалі крыж. Праз гэты знак збаўлення сёстры на працягу ўсяго жыцця асаблівым чынам разважаюць над пасхальнымі таямніцамі, чым характарызуецца духоўнасць гэтай кангрэгацыі.
Пасля прынясення абяцанняў с. Аўгустына CSC вярнулася ў Беларусь, дзе працягвае служэнне ў парафіі Божага Цела ў Крамяніцы (Ваўкавыскі дэканат).
Кс. Юрый Марціновіч
