У Гродзенскай вобласці дабрачыннае каталіцкае таварыства “Caritas” працягвае рэалізоўваць рэспубліканскі праект “YES!”.
Міжнародны праект “YES!” – “Скарачэнне беднасці шляхам працаўладкавання сацыяльна неабароненай моладзі ў менш развітых рэгіёнах Беларусі” рэалізуецца “Caritas” Беларусь па ўсёй рэспубліцы пры падтрымцы дабрачыннай арганізацыі “Renovabis” (Германія) і “Caritas Linz” (Аўстрыя) з мэтай павышэння ўзроўню жыцця маладых людзей Беларусі ва ўзросце 17–35 гадоў, якія патрабуюць падтрымкі.
Паспяхова прайшло адкрыццё Рэгіянальнага цэнтра развіцця сацыяльна-арыентаванага мясцовага прадпрымальніцтва ў Шчучыне. Функцыя кансультацыйнага цэнтра для моладзі – аказанне падтрымкі ў галіне прадпрымальніцкай дзейнасці. Тут плануецца арганізацыя сустрэч, правядзенне прэзентацый бізнес-ідэй, адукацыя груп па інтарэсах, прыцягненне ў праект прафесіяналаў і спецыялістаў у розных сферах, ментараў. Праблемы пошуку працы ў моладзевым асяроддзі, асабліва ў сельскіх раёнах, могуць быць вырашаны шляхам аказання падтрымкі маладым людзям праз прафарыентацыю і працаўладкаванне, самазанятасць і прадпрымальніцтва.
Дасягнута пагадненне аб супрацоўніцтве з ААТ “Белаграпрамбанк”. Цэнтры прыцягнення “Igrow.by” банка даюць магчымасць правядзення каворкінгаў з моладдзю, служаць пляцоўкамі для арганізацыі навучання трэнерскага складу, а ў будучыні – для правядзення трэнінгаў з мэтавымі групамі. Мэтавую групу праекта “YES!” складаюць маладыя людзі ва ўзросце 17–35 гадоў, якія знаходзяцца ў менш спрыяльным сацыяльна-эканамічным становішчы па прычыне пражывання ў сельскіх раёнах або невялікіх гарадах.
Акрамя таго, магчымасць прайсці бясплатнае навучанне атрымаюць людзі з інваліднасцю, а найбольш мэтанакіраваным будзе забяспечана падтрымка ў распрацоўцы і суправаджэнні асабістых бізнес-ідэй.
Завяршыўся этап навучання кваліфікаваных трэнераў (педагогаў і людзей з іншай прафесійнай адукацыяй) для працы ў праекце “YES!”. Трэнерскі склад па Гродзенскай вобласці будуць прадстаўляць людзі з вышэйшай адукацыяй, якія маюць вопыт у правязенні трэнінгавых заняткаў. Прафесійныя педагогі, псіхолагі, юрысты, прадстаўнікі бізнесу, маркетолагі і кансультант па прадпрымальніцтве – тыя спецыялісты, якія скіруюць свае намаганні на правядзенне трэнінгаў па планаванні кар’еры і самазанятасці, падчас якіх будуць вызначаны індывідуальныя навыкі і кампетэнтнасць моладзевай групы.
Падыходзіць да завяршэння распрацоўка інфармацыйных матэрыялаў і вучэбна-метадычных дапаможнікаў для правядзення трэнінгаў, а таксама інфармацыйных матэрыялаў для працы рэгіянальных цэнтраў, якія змяшчаюць сістэматызаваную інфармацыю па аналізе рынкаў, методыку працы з бізнес-ідэямі і распрацоўкі бізнес-планаў. Гэтыя матэрыялы будуць выкарыстоўвацца для кансультацый з маладымі людзьмі.
У цяперашні час праходзяць анлайн-сустрэчы і індывідуальныя кансультацыі па абмене вопытам каардынатараў праекта, трэнерскага складу, падрыхтоўка прафарыентацыйных заняткаў. Наступны этап рэалізацыі праекта – паступовае вывучэнне, праз апытанне і анкетаванне жадаючых, мэтавых груп, аналіз іх запытаў на навучанне або кансультацыі.
Рэалізацыя праекта “YES!” дазваляе не проста дапамагчы людзям, якія апынуліся ў складанай фінансавай сітуацыі, але і пашырыць магчымасці маладых людзей па развіцці асобаснага патэнцыялу праз навучанне, працаўладкаванне і кар’ерны рост.
Каманда праекта запрашае да супрацоўніцтва і ўдзелу ў мерапрыемствах шырокае кола як маладых людзей, так і арганізацый і ўстаноў, зацікаўленых у рэалізацыі ўзаемных мэтаў і задач.
Наталля Вішнеўская
