11 красавіка, у нядзелю Божай Міласэрнасці, парафія св. Тэрэзы ад Дзіцяткі Езуса ў Астрыне (Шчучынскі дэканат) адзначала адпустовую ўрачыстасць.
У гэты дзень парафіяльную супольнасць наведаў Генеральны вікарый Гродзенскай дыяцэзіі біскуп Юзаф Станеўскі.
У святыні іерарх узначаліў адпустовую Імшу, падчас якой невялікая група вернікаў прыняла сакрамэнт хрысціянскай сталасці.
У гаміліі дапаможны біскуп Гродзенскай дыяцэзіі казаў пра тое, што Бог багаты на міласэрнасць і ласку. Іерарх падкрэсліў, што Пан не хоча караць чалавецтва, а жадае яго аздаравіць, прытуляючы да свайго міласэрнага Сэрца.
Звяртаючыся да тых, хто быў у гэты дзень узбагачаны сямю дарамі Святога Духа ў сакрамэнце канфірмацыі, біскуп заахвоціў іх старацца кожны дзень быць “вітражом”. Ён патлумачыў, што гэта значыць частку святла пакідаць для сябе, каб быць прыгожымі перад Богам, а частцы дазваляць быць прапушчанай праз нас і ў выглядзе дабра асвятляць жыццё іншых, якія, можа, знаходзяцца ў ценю.
Біскуп заклікаў не толькі прымаць Божыя ласкі для сябе, але і перадаваць іншым.
На заканчэнне Эўхарыстыі пробашч парафіі кс. Зянон Рамейка SCJ падзякаваў іерарху за прыбыццё на ўрачыстасць і ўмацаванне вернікаў Божым словам, а таксама дарамі Духа Святога.
Кс. Юрый Марціновіч
