28 сакавікa, у нядзелю Мукі Пана, або Пальмовую нядзелю, якая распачынае Вялікі тыдзень, біскуп Гродзенскі Аляксандр Кашкевіч узначаліў святую Імшу ў катэдральным касцёле св. Францішка Ксаверыя ў Гродне.
У гэты дзень у святыні чыталася апісанне Мукі Пана, пасля чаго іерарх звярнуўся да вернікаў з гаміліяй.
Біскуп адзначыў важнасць Пальмовай нядзелі, якая нагадвае пра ўезд Езуса ў Ерузалем, каб там памерці і ўваскрэснуць, а таксама распачынае святкаванне пасхальнай таямніцы.
Па словах іерарха, Сын Божы – Збаўца, пасланы Богам Айцом з вялікай любові да кожнага чалавека.
“Ён прыйшоў, каб людзей, закранутых грахом, узнімаць сілай свайго прабачэння і міласэрнасці, каб асвяціць сваёй ласкай і прывесці да вечнага збаўлення”, – дадаў біскуп.
Пастыр Касцёла на Гродзеншчыне падкрэсліў, што Езус не носіць залатой кароны, не трымае ў руках скіпетра і не сядзіць на высокім троне; на Яго галаве карона з церня, Яго трон – крыж, а з Яго прабітага боку выцякае кроў, якая абмывае нашы правіны і адкрывае шлях да нашай нябеснай айчыны.
“Менавіта такога Караля – міласэрнага, спачуваючага, любячага кожнага з нас бязмежнай любоўю – мы жадаем сёння прывітаць”, – сказаў іерарх.
Біскуп заахвоціў прысутных у святыні вернікаў, а таксама тых, хто яднаецца з імі духоўна праз інтэрнэт, ахвяраваць Езусу ўсё, з чаго складаецца наша жыццё.
“Усё, што сустракаецца нам на шляху, мае свой сэнс, усё служыць нашаму збаўленню”, – дадаў ён.
Іерарх заклікаў перажыць Вялікі тыдзень, які распачынаецца ў Пальмовую нядзелю, годным і належным чынам.
“Няхай гэты час дапаможа нам нанава адкрыць і перажыць таямніцу бязмернасці Божай любові. Каб у гэтыя дні мы асабіста сустрэліся з Хрыстом, які за нас памёр і ўваскрос”, – падсумаваў пастыр дыяцэзіі.
Таксама біскуп благаславіў пальмовыя галінкі, якія вернікі па традыцыі прынеслі ў святыню на памяць пра ўваход Езуса ў Ерузалем.
Кс. Юрый Марціновіч